Read Sangtam Naga JOB 41 Bible Online

JOB 41 - Sangtam Naga bible

JOB 41

¹Nühnü ngu hohsingnü Kijang hohchehnung do? mahkhang rangdüshünü amüle rahchehnung do?

²Nühnü anaking la rangdüshü mahkhang aha la ngu hohsing yohjüchehnung do?

³Abinü nü te abi tsisohng pü kihchinung do? Abi te müisohnung nü te kihchinung do?

⁴Abinü akang ayung nüh dikehnung nyengcho yuzi külüpnung do?

⁵Akangcho uza khüdu kyo nühnü abi rahchehnung do? nü kulilarü nyekanungthsa.

⁶Nguh rangrünü abi chahnü jingchonung do? Airünü abi khanah inung do?

⁷Nguh ipinü aküp la chirangjünung do? mahkhang idhse amüxinü athah chirüpjüchehnung mah-o?

⁸Abi chah khüdupi thahpüng ko nühnü khodesü thali müthahpünung; ruhtaba tsü nühnü khodesü münbüchünung.

⁹Kijang ngurünü dropehre ko alih la khülure.

¹⁰Abi ruhmüsude, abi adrünung khüdu; sünüsü abi bete müyacheh.

¹¹Sünü abi te ruhtapü müdhsakehnung? Limih la sünüsü hütsüta münguchicheh.

¹²Kijang jing nengdang nü te yonung ko abi khütoh-inang nü te changnah yonung.

¹³Sünüsü abi küp mürohnahchehnung mahkhang abi chah khakhu müchicheh.

¹⁴Adrünung aha kehba be tsü sünü khangthrujüchehnung?

¹⁵Abi khangtung tsü tsungnü chungtiko, lungzinü kyo rahtiko.

¹⁶Achungkehta tsü dee adrengdreng, anyüh kahla nyübongza mii müzüdu.

¹⁷Arüh apüm dee drengdreng chungkehtachonü, tunüsü hütsü müzasohcheh.

¹⁸Abi hahthide mongirürahre, ko anahtse tsü nyüchürocho kyo tehre.

¹⁹Abe lanü mihmüle chürore, ko mihtsoh tsohcheh tsire.

²⁰Anabong lanü mikhu shichehre, za trüpcho kyo.

²¹Asah chicho la michang trure; abe lanü mihmüle chürore.

²²Angutung tsü müküprachonü, abi ngurü apümnü drüre.

²³Aküp la tase müzeh müdüm müle hütsü idhse kyo azi lile.

²⁴Abi lung lasiking la tsü, adrüba müle anyehsing lungzah kyo azi.

²⁵Abi shemüsude, athrungrü mii drüre; arüh adrüchonü shehre.

²⁶Tu nohshengnü abi lerohpehjünung mükoh; thsuh, tbüdeng mahkhang tbüza, tunüsü abi müdhsakehjücheh.

²⁷Abi nengdang idhse tsü manying kyo ayingya, ko imüyeng tsü sing sühcho kyo anana.

²⁸Abi dro tsisohnungthsa tbüdeng müle, abi chah müpba lung tsü manying roh-i.

²⁹Abi nengdang singking tsü manying roh-i, ko thsuh tsa müthehde abinü münyodhengre.

³⁰Amiküp tsü füh lahnahcho lung akoh kyo; hütsünü manyehji kyo alih la chongbong tsü thsohnahre.

³¹Kihdi tsü tsüchi yaba kih kyo ko tuji füh kyo tsüchisohre.

³²Abi khu tsicho lang riri kangsohre, ko kihdi tsü müjümüphi kangsohre.

³³Limih la abi te kihtanung tu müle abi tsü tusü müdrüba kanglungrü.

³⁴Kanglungrü amütsa apüm abinü mükhichire; rangmü kanglungrü apüm michah abi yangthsaba.