Read Sangtam Naga JOB 5 Bible Online

JOB 5 - Sangtam Naga bible

JOB 5

¹Dsidheng, Job, khürünü laling a mahnang. Nüh tsikehnungthsa riwürü khüdusü mülio?

²Nü jangjang longriseh sünunglü, amüsithsa athohmüzeh nguchi thsanung.

³Atsikehchah yangchiba adohrü Ihnü nguko, ta Ihnü arüh kukhi la dhrongyeng chokehchola dsichojücho.

⁴Arüh tsurü khodesü atsikehchah müngu; yukha chah sünüsü ya arüh mükhüm.

⁵Yangseh lirünü adohrü chisicho ko zeng yola zicho fürü mii tsunung; müxümüngurünü akuthsi tsukhangjüre.

⁶Amünyi tsü alihsu la müzire, mahkhang alih lanü athsangthsi müchürore.

⁷Yutsatsa, nyitsarünü apu chah thsangthsi hirore, michang lanü mihtsoh mülakeh tsicho kyo.

⁸Ih tsü nüh-erelang, Ihnü Tsingrang yang I khiyu hi hinung.

⁹Abinü nguchiba nguchi arangcheh hi Ihsanü münyicheh, ko Abi thsayahiya achangka müle.

¹⁰Abinü alih khyang tsing rosohre ko luh la kih xahre.

¹¹Ho, Tsingrangbanü alonglümrü dhimüsure ko alongrirü khyang akünyang jüre.

¹²Abinü akhürahrü lümchung thsangnyangjüre, ko lümlong lirü arühbürünü chungcho la xohsohre, hütsü khu arühnü nguchicho tusü akoh müngure;

¹⁴nyüthung la mii arühnü amarürah la hümchire.

¹⁵Ta Tsingrangbanü mürürü asü lanü khümchore; Abinü chongcharü asehchirü kheh lanü khümchore.

¹⁶Abinü ailümrü khyang alongdi jüre ko amütsarü be khangtijüre.

¹⁷Tsingrangbanü müchongchijürü akünyangnung; Abinü nüh khatade tüwah.

¹⁸Abinü thsakehjüre, ta rümjüre; Abi khehnü thsakehjüre, ko Abi khehnü kyangjüre.

¹⁹Dhsürü dhüroh lanü nüh khümchonung; dhünyeh-u la tunüsü nüh müdhsakehjünung.

²⁰Yangkong rode Abinü nüh khümcho yohpünung, ko chita la asü lanü nüh tsungtinung.

²¹Tsingrangbanü nüh müle sühsehrü chahnü khümchonung; achangka rode Abinü nüh khümchonung.

²²Shüh khatoh ko yangkong la nüh münyünung ko rangmü kanglungrü müdrünung.

²³Nühnü xüba luh tsü lung müzehnung; rangmü kangdinü khodesü nüh müdhsakehjünung.

²⁴Hütsüde nü kuhla nüh tbachi linung; nühnü nü santi dhengde, arüh müchahpü ngunung.

²⁵Alih la zanu toi nü tsuzarü suhnung.

²⁶Maxa kyang chihde litoh nyicho kyo, nüh kutsüp linung.

²⁷Job, hi ihrünü anyahli khi yangchipü nyichocho lile. Hi yuje, ade hi khyüchoung.