Read Sangtam Naga JOB 8 Bible Online

JOB 8 - Sangtam Naga bible

JOB 8

¹Nüh adeng yu choba tsü thümko ang?

³Tsingrangbanü yuje tsü khodesü mükhyümülare; Abinü athsalang nguchi khodesü mülahphehre.

⁴Nü tsurütinü Abi nyüm amünyi shitpahpü linung, ko hütsü ngang Abinü arüh khingchichobae.

⁵Ta ade ximülang ko Akohbong Tsingrang te kihchieng;

⁶nüh hidoi yuje ko amüsa thsakhang, Tsingrangbanü ro nüh rükunung ko nü jiyüthsa nü kukhi thali külüpchijünung.

⁷Hütsüde Tsingrangbanü nü khyang jünung liba kuthsi tsü achangpehba apüm te mülihtachehnung.

⁸Jümü lümlong tsü dhingdheng; Ihsa tpurünü nyichocho yuje tsü lümdheng.

⁹Ihsa akang hi akhikyah du, Ihsanü tusü mümüdhe; Ihsa nbükhüm kyo limih khu lahkhure.

¹⁰Ta jümü müdhemüthehrünü nü te dosohng; arühnü yoba tsü nyieng:

¹¹“Kih müli la thoh müyare; arüh changtphü tenü za müngunung.

¹²Kih tsü kungkhang arüh akhu mükunung, kyo bichinung mah-enü.

¹³Tsingrangba mümüdherü tsü hütsü kyole; Tsingrangba nbüchüde, arüh alongdi changre.

¹⁴Arühnü sherila-shepüm khüdu shürüshütpah chah longlangre.

¹⁵Shürüshütpah chah ngakehde, hütsünü arüh ramehchehnung do? Arühnü she khüdu chah ramehde, arüh yachehnung do?”

¹⁶Amütsarü tsü nyü hela za chicho kyole, tbü apüm la za tsüchehcho kyo.

¹⁷Lung chah ara tsünü ratire ko lung üpüm chah khahkhah rakehre.

¹⁸Ta arüh tsü rohchehde, hütsü chah rakeh lichoepü sünüsü mümüdhenung.

¹⁹Ho, amütsarü akünyang tsü hütsü du; aparü ro arüh mülih yapehre.

²⁰Ta Tsingrangbanü yuje chorü khodesü müpehre, mahkhang amütsarü khodesü mürükure.

²¹Abinü nüh münyüsohnung ko adesü züdesohnung,

²²ta nü thrünyirü chah Abinü ashah hirojünung ko amütsarü kukhi changpehnung.