Read Sangtam Naga NENGSEKHI 102 Bible Online

NENGSEKHI 102 - Sangtam Naga bible

NENGSEKHI 102

¹I dangkhidangnang nyijüng, O ABÜDONGBA, ko I kihchicho nyieng!

²Ih chongcha la lide, I tenü tüximüla! I te nyieng, ko Ihnü dside zah laling!

³I kang mikhu kyo chang tsire; Ifü michang kyo tahpehre.

⁴Ih za kungcho kyo kungpehko; Ih tsang mütsunyopehko.

⁵Ih zi rühchire; Ih arüh du kang threhchehko.

⁶Ih lihpi la hogon kyo lile, apehcho lih la bhohphu kyo lile.

⁷Ih müyüpsehre; kuhmung chah longyüseh liba uza kyo Ih lile.

⁸Mükhyang I rorütinü müthsamünyüre; Ih münyüjürütinü I neng dangchi chokehcholare.

⁹Nü zii ko rihlong chürochonü, mitru I tsang thsare; ko I nahshükih I shing la shoyohre. Tunüo Nühnü Ih hiro dhiyohchüpehcho.

¹¹Anyüzehlang nbükhüm kyo I kang lile; Ih zanu akungcho kyo lile.

¹²Ta O ABÜDONGBA, Nüh lede Yangthsaba. Shang apümnü Nüh lümkehnung.

¹³Nüh shemüsunung ko Zion chomangnung; abükyü chomangnung akyange; ade becho lile.

¹⁴Nü dikehrütinü abükyü müire, abükyü changpü linye; abükyü thsangnyangpü linye, arühnü abükyü chomangcho.

¹⁵Yanglihtinü ABÜDONGBA drünung; limih yangthsarü atümungnü Abi tase drünung.

¹⁶Khode ABÜDONGBAnü Zion külüpchinang; Abi mülahcho mishanung.

¹⁷Athrüchahchüpehchoti te Abinü nyinung, ko arühnü kihchicho yuchinung.

¹⁸Mükhoh la zehrütinü Abi senungthsa ABÜDONGBAnü tu nguchicho hütsü aronung shang nengdang thrahyohpüng.

¹⁹ABÜDONGBAnü Abi Amüsa amichahba lanü dhengchahchücho, Abinü ninglangnü alih la dhengchahchücho.

²⁰Arangyohrü rühchicho Abinü yuchicho, ko sünung mülangjürüti lehcheh müthehcho.

²¹Hütsünü Abi neng Zion la sobhonung, ko khode yuchoti ko yanglihti müjang shibülung ABÜDONGBA mübonang,

²²Jerusalem la Abi senung.

²³ABÜDONGBAnü Ih azadenü suhmüzeh külüpcho; Abinü I kang akhikyah kangsohcho.

²⁴O Tsingrang, Ih müshide Ih tükhyümüi. O ABÜDONGBA, Nüh lede lire,

²⁵papade Nühnü limih thricho, ko nüpu khehnü Nühnü ning thricho.

²⁶Arüh changnung, ta Nüh linung; Shü kyo arüh apüm threhnung. Nühnü shü kyo arüh pehnung, ko arüh changnung;

²⁷Ta lede Nüh asusuh, ko Nü kang müchangkanung.

²⁸Ihrü tsurüti khümcho linung, ko Nü atsungtiba pohki arüh chahnü trahchochoti khümcho linung.