Read Sangtam Naga NENGSEKHI 104 Bible Online

NENGSEKHI 104 - Sangtam Naga bible

NENGSEKHI 104

¹ABÜDONGBA seing, I nbü! O ABÜDONGBA, I Tsingrang, Nüh khütoh-i arangcheh-o! Nüh adi ko ahechinü jeng lile;

²atsingsenü nüpu müshüti lile. ninglanglih tsü Nühnü shükuh roh-i khyangpole,

³ko amilang kih michah Nü kuh thsa lile. Nyükhi tsü Nühnü Nü kari kyo bichire ko nyübong chah Nühnü shangre.

⁴Nyübong tsü Nühnü Nü yusi hirü kyo, ko ningmüla tsü Nü riwürü roh-i bichire.

⁵Limih tsü Nühnü amüdongkehji chah drengdreng yohpüle, ko hütsü khodesü mümühachinung.

⁶Hütsü michah kihjü tsü Nühnü müyah roh-i yohpüle, ko azongti tsü kihnü tingti lile.

⁷Khode Nühnü kih tsü yübonang, arühnü tsire; Nü yuzeng khongcho yuchide arühnü tsire.

⁸Nühnü arüh khyang throcheh yohpüjüba azong michah tuwücho, ko angah yang jowücho,

⁹Thali limih tingtinung lanü khümchonung nengdang, arühnü khodesü mükhuchehnungthsa Nühnü lurüh yohpüko.

¹⁰Angah la Nühnü kih züchehsohre; ko azongti kahla yongkhi pohsohre.

¹¹Arühnü rangmü kanglungrü shulüm kih chixire; hütsüla rangmü gaduti xodhrümre.

¹²Shüdhün liba singdongti chah, uzatinü arüh süp shüre ko khi thsare.

¹³Ninglangnü Nühnü azongti khyang tsing rosohre ko Nü amüwanungnü limih tsü jengre.

¹⁴Nühnü misü khyang za ko Nyitsarü khyang singdong zisohre, hütsünü abi tsahma zisohnung

¹⁵ko abi künyangsohnung yongkha, abi longtbasohnung olive tuji, ko tase nengdang hümthse chürosohre.

¹⁶Lebanon la Cedar sing nengdang tsing thangchi ngure, ABÜDONGBA apunü khyümcho, apu singdong.

¹⁷Hütsü chah uzatinü arüh süp shüre; Kih uzanü kee sing chah asüp shüre.

¹⁸Shuhunü azong athseng chah lire ko dhengtsünü lungrah la ku münyire.

¹⁹Tsingkang müyü müdhenung Nühnü chonu külüpcho; Nyünü züdunung akyang müdhere.

²⁰Nühnü aromang külüpcho ko amala rangmü kanglungrü apüm chürore.

²¹Tsingrangbanü chixiba tsuyong yangchide, kangdi zanü rengre.

²²Khode nyü chüronang, arühnü thali wü arüh kuhla yüpjore.

²³Hütsüde nyitsarünü wünü ama yingcheh nguchire.

²⁴ABÜDONGBA, Nühnü hütsüdoi külüpko! Nühnü pisara arüh külüpko! Limih tsü Nühnü thrichotinü jeng lile.

²⁵Wünü kihjü khüdu arangcheh ko amüza, hütsüla mükhicheh kanglungrü, aikyah ko arangcheh lire.

²⁶Hütsüla kihkuh tbhengre, ko Nühnü thriba kihkangdi Kijang mungre.

²⁷Arüh atümungnü akyang tsuyongnung ngunung Nüh yingre.

²⁸Nühnü arüh khyang jüre ko arühnü tsure; Nühnü tsuyongnung jüre ko arüh longnyüpre.

²⁹Nüh ximüla tside, arüh drüre; Nühnü arüh sah hitside, arüh süre ko thali alih kangre.

³⁰Ta Nühnü asah jüde, arüh chichehre; Nühnü alih khyang akang asi jüre.

³¹ABÜDONGBA ahechi müchangka lieng! Apunü külüpcho la ABÜDONGBA künyangsohng!

³²Abinü alimih chah dhengre, ko hütsü dhridhrire; Abinü azong chah thahpüre, ko hütsü lanü mikhu chürore.

³³Ihnü ABÜDONGBA te I kang ayung khi thsanung; Ih akang li tashi I Tsingrang te nengsekhi thsanung.

³⁴I khinü Abi künyangsohng, tunüo I akünyang Abi chahnü rore.

³⁵Münyirüti limih chahnü changsohng; ko amütsarüti adelü tülisoh. ABÜDONGBA seing. I nbü! ABÜDONGBA seing!