Read Sangtam Naga NENGSEKHI 106 Bible Online

NENGSEKHI 106 - Sangtam Naga bible

NENGSEKHI 106

¹ABÜDONGBA seing! ABÜDONGBA khyang anengse jüng, tunüo Abi atsa lile; Abi amüi achangka müle.

²Abinü nguchicho hitoh-i nengdang sünü yochehnung? Sünü Abi sekhangnung?

³Sürünü Abi yuzeng bichiro, sürünü tu athsalang hütsü lede nguchiro arüh akünyangnung.

⁴ABÜDONGBA, Nühnü Nü nyitsarü trode Ih lümchehng; arüh khümchode Ihsü zehsohng.

⁵Nü nyitsarü müwacho Ihnü ngunyüre ko Nü limih ko Nü nyitsarü akünyang tsü changtanyüre.

⁶Ihrü jümürüti kyo ihrünü shitpahko; ihrünü amütsa amünyi nguchi roko.

⁷Ijip la ihrü jümürünü Tsingrangba anyemüyangnung nguchi münyichehko; Abi amüi khütangpi arüh te ngusohba tsü arühnü nbüchüko, ko arühnü Amoh Kihdi la Akohba nyüm yako.

⁸Ta Abi tase amülah ngusohnung, Abinü nyengchocho kyo Abinü arüh khümchocho.

⁹Abinü Amoh Kihdi khyang yuzeng jücho, ko hütsü kungpehcho; ko alih akung lanü arüh nüchehcho.

¹⁰Arüh thrünyirü kheh lanü Abinü arüh khümchocho; arüh rorüh kheh lanü Abinü arüh ruhchocho.

¹¹Ta arüh rorüti kih la mülingsehkhangsohcho; arüh süsü münying.

¹²Hütsüde arühnü Abi anyengchocho yudsicho ko Abi nengsekhi thsacho.

¹³Ta Abi nguchicho arühnü zah nbüchopehcho ko Abi yu müyingpü nguchicho.

¹⁴Arüh lipilih la mükhyamürahnü jengcho ko Tsingrangba thsatsücho;

¹⁵Achotsü arühnü chingcho roh-i jücho, ta arüh yola adrünung dhsara mii müthehcho.

¹⁶Lipilih la arühnü Mosa ko Aron, Tsingrangba Amüsa dikehrü chah nahmohcho.

¹⁷Hütsüde alih kapü Dathan münyücho ko Abiram ko abi kukhi pheticho;

¹⁸arüh monoti chah michang jüro amütsarüti trüpsehcho.

¹⁹Arühnü Sinai chah hon-nü misüpung külüp-pü hütsüba kyothri tsü mübücho;

²⁰arühnü Tsingrangba ahechi tsü za tsuba kanglungrü khüdu kyothri te mülitacho.

²¹Arühnü Ijip la akohba nguchi khu Tsingrangba sünü arüh khümchocho Abi nbüchücho.

²²Yu anyemüyangnung Abinü hütsüla nguchicho! Amoh kihdi la tu anyekanung hütsü nguchicho!

²³Tsingrangbanü anyitsarü changjünungepü yode, Abi dikehrü Mosanü Tsingrangba nyüm yarü müchangjüsohnung Abi zii dümticho.

²⁴Hütsüpü arühnü alih asu mükhyüchocho, tunüo Tsingrangba anyengchocho arühnü müyudsicho.

²⁵Arühnü arüh shükuh la du pümpü jümjümnü ABÜDONGBA te münyicho.

²⁶Achotsü Abinü lipilih la arüh süsohnung

²⁷ko arüh trah apümlang shupishuzasohnung ko limih pa la süsohnungepü müzahsohcho.

²⁸Peor la Abi nyitsarütinü Baal mübüba la zehcho, ko asücho tsingrang khyang kangmübü jücho tsucho.

²⁹Arüh nguchi khu ABÜDONGBA rihlong chürosohcho, ko adrünung dhsara arüh yola chürocho.

³⁰Ta Finehasnü shemüsu athsamehba tsü khingchicho, ko dhsara tsü zahcho.

³¹Hütsü tinü lede abi lümkehre ko aronung shangnü shang lümkehnung.

³²Meriba kihnatung la arühnü ABÜDONGBA zichürosohcho, ko arüh thsacholanü Mosa chongchasohcho.

³³Arühnü abi khura wahsohchonü abinü mülümdhengpü chonungthsa kangsohcho.

³⁴ABÜDONGBAnü arüh te nguchinung yocho kyo, arühnü müyudsirü mümapsehcho,

³⁵ta arühnü arüh te kuthri-yangthri müyudsirü nguchi dhengchocho.

³⁶Arühnü kyothri mübücho, hütsü khu arüh athsangnyang chürosohcho.

³⁷Arühnü arüh tsurü ko tsularüti Kanan kyothriti khyang kangmübü jücho.

³⁸Achomükeh azarüti arühnü mapsehcho, ko hütsüri shühnü limih tsü münyijücho.

³⁹Arühbürü nguchi khu arüh amümüsa kangcho, ko Tsingrangba te yuje mücho licho.

⁴⁰Hütsünü arüh te ABÜDONGBA zichürocho; ko Abinü arüh te mükünyangcho.

⁴¹Abinü müyudsirü khehla arüh thrüchahchüpehcho, ko arüh rorütinü arüh michah yangthsacho.

⁴²Arüh rorütinü arüh nyüpmüsehcho, ko khüdupinü arüh pohki sehchicho.

⁴³Adrongpi ABÜDONGBAnü arüh khümchocho, ta arühnü Abi nyümnung throcheh alaa amünyi la züducho.

⁴⁴Ta arühnü züdede ABÜDONGBAnü nyicho, ko arüh chongcha müdhecho.

⁴⁵Arüh khyanglangnü Abinü azengtacho lümchehcho, ko Abi amüi yanglilüm khu alasih thsamülacho.

⁴⁶Abinü arüh sehchinü atümung khyang arüh shulüm thsa lümsohcho.

⁴⁷Ihrü khümchoung, O ABÜDONGBA ihrü Tsingrang, yangpilangnü ihrü thali norung; ko ihrünü künyangnung ko Nü Amüsa nengsenung.

⁴⁸ABÜDONGBA Israel Tsingrang seing; ade ko achangka müli Abi seing! “Amen” pü atümungnü yosohng! ABÜDONGBA seing!