Read Sangtam Naga NENGSEKHI 109 Bible Online

NENGSEKHI 109 - Sangtam Naga bible

NENGSEKHI 109

¹O Tsingrang, Ihnü Nüh sere; sahmüthsa tüli!

²Amütsarü ko arahkhehrünü Ih beko. Arühnü I nengdang arahkheh yore

³ko Ih nyüm chore, tu yuzi mülipü Ih bere.

⁴Ihnü arüh müi nye ko dangkhidangnangjü nye arühnü Ih nyümre.

⁵Arühnü I khyang atsa mülih amütsa ko amüi mülih thrünyiba loli jüre.

⁶I rorüh yukhanung amükhyu yukharü throchehng, ko apu rorüh yola khüdunü mülangjüsohng.

⁷Abi mülangjo yukhasohng; abi akihchiba tsü amünyi roh-i kangsohng.

⁸Abi zah süsohng; khürü khyang abi mülisohng!

⁹Atsurüti mürürü kangsohng, ko anitpü chomisohng!

¹⁰Atsurüti chingkichingnangrü kangsohng; arüh kuh lanü arüh iipehsohng!

¹¹Akuthsi apüm anyasohrünü khyüsohng, anguchichehcho apüm shirünü khyüsohng.

¹²Sünüsü abi te tütsasoh mahkhang abinü pehjüba mürürüti sünüsü tüxükümsoh.

¹³Abi trah atümung changsohng, ko aronung shangnü abi neng nbüchüsohng.

¹⁴Arüh jümürü münyi apüm ABÜDONGBAnü lümchehsohng ko atpa münyi khodesü mülang tüpehjüsoh.

¹⁵Arüh münyi lede ABÜDONGBA khyang lümchehsohng, ta arühbürü khyanglü khüdupinü nbüchopehsong!

¹⁶Hütsüba nyitsarünü müinung khodesü mülüm; abinü ailümrü, athsangthsirü ko khütamüthsarü dhsümthsecho ko mapsehcho.

¹⁷Chokehcholanung abinü müicho, abi chokehcholaang! Müwajünung abinü thrünyicho, sünüsü abi tümüwajü!

¹⁸Chokehchola tsü abi jengki thsacho, abi fü tsü chokehchola la kihnü roh-i ko abi rüh tsü tuji la roh-i züsohng!

¹⁹Shünü kyo hütsürinü abi müshütieng ko rungrümnü roh-i abi yühtieng!

²⁰ABÜDONGBA, I rorüh sürünü Ih nyüm choro, hütsü kyo arüh khingching!

²¹Ta ABÜDONGBA, I Tsingrang, Nühnü nyengchocho roh-i Ih troung, ko Nü amüi atsaba khyanglangnü Ih khümchoung.

²²Ih ailüm thsangthsirü; I lasih yonglang thsakehko.

²³Anyüzehlang nbükhüm kyo Ih achangrüe; kangzah khüdu kyo Ih afo tsirüe.

²⁴Tsuyongnung müdsichonü I mükhoh re müzeh; Ih aküp ko arüh du kangko.

²⁵Nyitsarünü Ih ngude, münyodhengre; arühnü arüh thah ngahchire.

²⁶Ih rükung, O ABÜDONGBA, I Tsingrang; Nü amüthreba amüi khu Ih khümchoung!

²⁷I khümchobong tsü Nüh-epü I rorüh khyang müdhesohng.

²⁸Arühnü Ih chokehcholanung kohle, ta Nühnü Ih müwajünung. I dhsümthserü kohjüng ko Nü dikehbong künyangsohng.

²⁹I rorüti tsü awahnü jengsohng; arüh ashah tsü arüh jengki thsasohng.

³⁰Ihnü ABÜDONGBA khyang anengse züde jünung; ashimükhong la Ihnü Abi senung,

³¹tunüo Abinü ailümrü khümre ko abi süsohnung mülangjürü kheh lanü khümchore.