Read Sangtam Naga NENGSEKHI 119 Bible Online

NENGSEKHI 119 - Sangtam Naga bible

NENGSEKHI 119

¹Sürü akang achomükeh liro, sürünü ABÜDONGBA yuzeng la liro arüh akünyangnung.

²Sürünü Abi yuzeng bichiro, sürünü lasih apümnü Abi te nyiro, arüh akünyangnung.

³Arühnü khodesü amüthsalang münguchire; arühnü ABÜDONGBA lang la tsehre.

⁴ABÜDONGBA, Nühnü ihrü khyang Nü yuzeng jücho ko hütsüri yochonyi bichinung yocho.

⁵Nühnü thülachoti yuje cho bichinung Ihnü khütang lümre.

⁶Ihnü Nü yuzeng apüm bichikhang, Ih ashah mükhyünung.

⁷Ihnü Nüh yuje yukhaba nyichode, I lasih amüsanü Nü neng senung.

⁸Ihnü Nü yuzeng bichinung; Khodesü Ih tüpehjü.

⁹Dhrezarü khüdunü khüta abi akang müsacheh linung? Nü yuzeng bichichonü.

¹⁰I lasih apümnü Nüh dikehnung müküpre; Nü yuzeng lanü Ih za tülisoh.

¹¹Ihnü Nü yuzeng I lasih la yohpüre, hütsü dunü Ihnü Nüh nyüm amünyi müshitpahnung.

¹²Ihnü Nüh sere, O ABÜDONGBA; I te Nü yuzeng doung.

¹³Nühnü jücho yuzeng apüm Ihnü züde sobhonung.

¹⁴Kuthsi khütang licho tenü Nü yuzeng bichinung la Ih künyangre.

¹⁵Nü athülaba Ihnü lümdhengre; Nü adoba Ihnü müchehdhengre.

¹⁶Nü yuzeng la Ih künyangre; Nü yuzeng Ihnü münbüchünung.

¹⁷Nü adoba bichi linungthsa, Nü dikehrü te tsa bichieng.

¹⁸Nü yuzeng la anyemüyangnung yuje ngunungthsa I nah khangthrujüng.

¹⁹Ih azachah nengdang hiba limih la lile; I tenü Nü yuzeng türang.

²⁰Lümtohchonü I long dhridhrire; Ihnü Nü yukhaba shikhe apüm la müdhenyüre.

²¹Nühnü amüthsehrü khatare; Nü yuzeng münyirüti chokehcholare.

²²Nyüpmüseh ko müthsamünyüba lanü, Ih lehchehng, tunüo Ihnü Nü yuzeng yohpüko.

²³Yangthsarütinü shibülung Ih nyüm rah külüpre, ta Ih Nü adoba yangchinung.

²⁴Nü athülabanü I khyang akünyang jüre, arüh I trorü lile.

²⁵Alih la Ih khülu lile; Nü anyengchocho kyo Ih khamüsung.

²⁶I nguchi apüm Ihnü nyengchocho, ko Nühnü I te lalingcho; I te Nü yuzeng doung.

²⁷Nü yuzeng nyichehnung Ih troung, ko Ihnü Nü anyemüyang nguchi lümdhengnung.

²⁸Alongrinü Ih hehthsako; Nü anyengchocho kyo I re zehsohng.

²⁹Lang thrümehnung lanü Ih nülieng, ko chomangnü Nü yuzeng I te doung.

³⁰Ihnü yocho nyinung throchehko; Ihnü Nü yukhaba la lasih jüre.

³¹Ihnü Nü athülaba yohpüko, ABÜDONGBA; Ih ashah tükhyüsoh.

³²Ihnü longphiseh Nü yuzeng bichinung, tunüo Nühnü anyichehba alaa jünung.

³³I te doung, ABÜDONGBA, Nü yuzeng adüzü, ko Ihnü lede hütsüri bichinung.

³⁴Nü yuzeng yohpünungthsa, I te changnah young, I lasih apümnü Ihnü bichinung.

³⁵Nü yuzeng te yochonyi Ih yohpüjüng, tunüo hütsüla I akünyang ngure.

³⁶Alirü kangnung tenü, Nü yuzeng nyinung mürusohng.

³⁷Amii müliba la müsi jünung lanü Ih nülieng; Nü anyengchocho kyo I te tsaang.

³⁸Nü te nyirü te Nühnü nyengchocho kyo, Ih Nü dikehrü te Nü anyengchocho yohpüng.

³⁹Ihnü drüba nyüpmüseh lanü Ih khümchoung; Nü yukhaba khütoh-i anyemüyangnung!

⁴⁰Ihnü Nü yuzengti bichinyüre; I khyang akang asi jüng, tunüo Nüh Amüsaba.

⁴¹Nühnü khütoh-i Ih müirünang I te ngusohng, ABÜDONGBA, ko Nü anyengchocho kyo Ih khümchoung.

⁴²Hütsüpü du I nyüpmüsehrü te Ihnü lalingchehnung, tunüo Ihnü Nü yu la longlangre.

⁴³Lede Ih yuje du chosohng, tunüo Nü yukhaba la Ihnü longdire.

⁴⁴Ihnü lede Nü yuzeng achangka müli nyinung.

⁴⁵Ih nyüje la linung, tunüo Nü adoba nyinung Ihnü müküpre.

⁴⁶Yangthsarü te Ihnü Nü yuzeng müdhesohnung, ko Ihnü müshahnung.

⁴⁷Nü Yuzeng nyicho la Ih akünyang ngure, tunüo Ihnü arüh müire.

⁴⁸Ihnü Nü yuzeng drüre ko müire: Ihnü Nü athülaba la lümdhengchinung.

⁴⁹Ih Nü dikehrü te Nü anyengchocho lümchehng; hütsünü I khyang alongdi jüko.

⁵⁰Chongcha lasü Ih tbachi licho, tunüo Nü anyengchobanü akang jücho.

⁵¹Amütsarü tsü I müthsamünyürü lile; ta Nü yuzeng tenü Ihnü müza.

⁵²Papade Nü yukhacho lümchehre, ko hütsünü Ih tbachisohre, O ABÜDONGBA!

⁵³Amütsarünü Nü yuzeng thsangnyang ngude, I zichürore.

⁵⁴Limih la Ih azachah lide, Ihnü Nü yuzeng nengdang khi tangre.

⁵⁵ABÜDONGBA, amala Ihnü Nüh lümchehre, ko Nü yuzeng shulüm lümdhengre.

⁵⁶Nü yuzeng bichicho la Ih akünyang ngure.

⁵⁷Ihnü müruba apümnü Nüh du, O ABÜDONGBA; Nü yuzeng nyinung Ihnü nyengchore.

⁵⁸I lasih apümnü Ihnü Nü te kihchire, Nü anyengchocho kyo I te yanglilüm!

⁵⁹Ihnü I saying lümdhengko, ko Nü athülaba bichinung Ihnü nyengchore.

⁶⁰Mümünupü Nü yuzeng nyinung dhsüthsare.

⁶¹Amütsarünü I khyang zeng khyangpüjüle, ta Ihnü Nü yuzeng münbüchü.

⁶²Nü Amüsa yukhaba nengdang nengse jünung yürüptülung la Ih jesure.

⁶³Ih Nü dikehrü atümung ko Nü yuzeng bichirü atümung shangrü lile.

⁶⁴ABÜDONGBA, limih apüm Nü amüthreba amüinü jeng lile; Nü yuzeng I te doung.

⁶⁵ABÜDONGBA, Nühnü Nü anyengchocho yohpüko, ko Ih Nü dikehrü te Nühnü müiko.

⁶⁶I khyang lümlong ko amüdhe jüng, tunüo Ihnü Nü yuzeng chah longlangre.

⁶⁷Ih müthsakeh-ede, Ihnü thsameh tsicho; ta adelü Ihnü Nü yu nyire.

⁶⁸Nüh khüdoi atsa ko amüi! I te Nü yuzeng doung.

⁶⁹Amüthsehrünü Ih nyüm arahkheh yoko, ta I lasih apümnü Nü yuzeng nyire.

⁷⁰Nyitsarü hiri anyichehba müle, ta Ihlü Nü yuzeng la akünyang ngure.

⁷¹Ih khingchiba tsü I nengdang atsa licho, tunüo hütsünü Nü yuzeng nyichosohcho.

⁷²Limih la thsi apüm tenü Nühnü I khyang jüba yuzeng tsü awüba.

⁷³Nühnü Ih thricho ko khümcho yohpücho; Nü yuzeng nyichonungthsa I khyang anyichehba jüng.

⁷⁴Nüh drürütinü Ih ngude künyangnung, tunüo Nü anyengchoba la Ihnü longlangre.

⁷⁵Nü yukhaba tsü Amüsa ko Nühnü Ih khingchiba tsü Nüh yujeba thsachonüepü Ihnü müdhele, ABÜDONGBA.

⁷⁶Nü müthrehba amüinü Ih tbachisohng, Ih Nü dikehrü te Nü anyengchocho kyo.

⁷⁷I te yanglilüm ko Ih akang linung, tunüo Nü yuzeng la Ih akünyang ngure.

⁷⁸Arahkheh la Ih mülangjücho nyükheh amüthsehrü tsü ashah khyüsohng; ta Ihlü Nü athülaba yangchinung.

⁷⁹Nüh drürü ko Nü yuzeng müdherü atümung I yanglang rosohng.

⁸⁰I khyang Nü yuzeng ajeng nyisohng, ko I khyang ashah tükhyüsoh.

⁸¹Nü akangcheh yingchonü Ih kyahpehko; Nü yu la Ihnü longlangre.

⁸²Nü anyengchocho yingchonü I nah tsohchehko. Ihnü tsingdhengcho, “Nühnü khode Ih rükunung?”

⁸³Ih yongkha shinga koh kyo akhyüchah müle, ta Nü yuzeng Ihnü münbüchü.

⁸⁴Khüdoi nyahli Ihnü yingnung? I dhsümthserü khode khingchinung?

⁸⁵Nü yuzeng münyirü amüthsehrünü Ih xohsohnung mütrüm juko.

⁸⁶Nü yuzeng apüm longlangnung kehle; Nyitsarünü arahkheh la Ih dhsümthsere, Ih troung.

⁸⁷Arühnü azikyah dunü Ih mümapseh; ta Ihnü Nü yuzeng müpehjü.

⁸⁸Ihnü Nü yuzeng bichinungthsa, Nü müthrehba amüi khu I te tsa bichieng.

⁸⁹O ABÜDONGBA, Nü yu achangka mülinung; hütsü ninglanglih lasü achangka mülinung.

⁹⁰Nü longlangba shangnü shang linung; Nühnü alimih külüpcho, ko hütsü lidu lire.

⁹¹Nü yuzeng khu lüpcho chünye chii lire, tunüo arüh atümung Nü dikehrü lile.

⁹²Nü yuzeng khu Ih akünyang müngurelang, chongcha khu Ih sopehpü libae.

⁹³Ihnü Nü athülaba khodesü müpehjünung; tunüo hütsüri khu I akang yohpüjüre.

⁹⁴Ih Nü yo, Ih khümchoung! Ihnü Nü yuzeng nyinung müküpko.

⁹⁵Amütsarünü Ih mapsehnung jümre, ta Ihnü Nü yuzeng lümdhengre.

⁹⁶Lüpcho achangka lilepü Ihnü nyichoko, ta Nü yuzeng adekheng.

⁹⁷Ihnü Nü yuzeng khütoh-i müiro! Ihnü mükhyang hütsü nengdang lümdhengre.

⁹⁸Nü yuzeng I te lede lire ko I rorüh tenü alaa athsehthsa kangsohre.

⁹⁹Adorü tenü Ihnü alaa nyichehre, tunüo Ihnü Nü athülaba lümdhengre.

¹⁰⁰Azirü tenü I lümlong adiu, tunüo Ihnü Nü yuzeng nyire.

¹⁰¹Ihnü saying amütsa apüm müricho, tunüo Ihnü Nü yuzeng bichinyüre.

¹⁰²Ihnü Nü athülaba müpehjü, tunüo Nüpu I adorü lile.

¹⁰³Nü athülaba khütoh-i anyiyah thsakukih tenüsü anyiyahba!

¹⁰⁴Nü yuzeng lanü lümlong ngure, hütsünü saying amütsa apüm thrünyire.

¹⁰⁵Nü yu I jing nengdang dsi ko I lang nengdang atsingse.

¹⁰⁶Nü athülaba nyinung Ihnü Nü te yuchümre.

¹⁰⁷ABÜDONGBA, I chongcha dirale; Nü anyengchocho kyo I akang yohpüjüng.

¹⁰⁸Ihnü nengsejüba khyüchoung, O ABÜDONGBA. Ko Nü yuzeng I te doung.

¹⁰⁹I kang jünung Ih lede rungnüm lile; Ihnü Nü yuzeng münbüchü.

¹¹⁰Amütsarünü I khyang zeng khyangpüjüle, ta Ihnü Nü yuzeng münyi müle.

¹¹¹Nü yuzeng tsü lede I kuthsi; arüh I lasih la akünyang.

¹¹²Ih asü yingcheh; Nü yuzeng bichinung Ihnü dhrongchehko.

¹¹³Lasih anyüh thrirü Ihnü thrünyire, ta Ihnü Nü yuzeng müire.

¹¹⁴Nüh I khümrü ko I tsungtirü, Nü yu la Ihnü longdire.

¹¹⁵Nührü münyirüti, I tenü tsieng. Ihnü I Tsingrang yuzeng nyinung.

¹¹⁶Nü anyengchocho roh-i I khyang tase jüng ko I akang linung; I longdicho la I suh tüzahsoh!

¹¹⁷Ih marehng, ko Ih khümcho linung, Nü yuzeng lede bichinung.

¹¹⁸Nü yuzeng münyirü atümung Nühnü mükhyüchore, arüh akhürah lümchung amii müle.

¹¹⁹Amütsarü atümung Nühnü sehnyeh kyo khichire; hütsünü Ihnü Nü athülaba müire.

¹²⁰Nüh drüchonü Ih dhridhrire; ko Nü yukhaba Ihnü drüre.

¹²¹Tu athsalang ko atsa hütsü Ihnü nguchiko; I rorüh khehla Ih tüjü!

¹²²Nü dikehrü tronungepü nyengchoung; Hongzirünü Ih tüsehchisoh!

¹²³Nüh akhümcho ko Nü Amüsa anyengchocho tikehnung yingchonü I nah tsohchehko.

¹²⁴Nüh müthrehba amüi aichi Ih bichieng, ko Nü yuzeng I te doung.

¹²⁵Ih Nü dikehrü, Nü adoba nyichehnungthsa I khyang anyichehba jüng.

¹²⁶ABÜDONGBA, hi Nühnü nguchinung akyange, tunüo nyitsarünü Nü yuzeng münyire.

¹²⁷Ihnü hon ko müluchehcho hon tenü Nü yuzeng alaa müire.

¹²⁸Hütsünü Nü athülaba apüm bichire; Ihnü arahkheh lang apüm thrünyire.

¹²⁹Nü adoba anyemüyangnunge; Ihnü I lasih apümnü hütsüri nyire.

¹³⁰Nü yu changnah yobanü atsingse jüre ko amümüdherü khyang lümlong jüre.

¹³¹Nü yuzeng mükhyahchonü; Ihnü I be kapü yingre.

¹³²Nühnü müirü atümung te nguchicho kyo, I yang ximülang ko yanglilüm ngung.

¹³³Nü anyengchocho kyo, Ih tüngahsesoh; amünyinü Ih tükohsoh.

¹³⁴Ihnü Nü yuzeng nyinungthsa, I nyümrü kheh lanü Ih khümchoung.

¹³⁵Nü dikehrü chah Nü romih hekehjüng, ko I te Nü yuzeng doung.

¹³⁶I nahshükih yongkhi roh-i pohre, tunüo nyitsarünü Nü yuzeng münyire.

¹³⁷ABÜDONGBA, Nüh Amüsa ko Nü yukhaba yuje.

¹³⁸Nühnü jüba yuzeng khüdupinü atsa ko yuje lile.

¹³⁹Michang kyo I rihlongnü trüpre, tunüo I rorütinü Nü yuzeng mükhichire.

¹⁴⁰Nü anyengchoba tsü müchehdhengko! Ihnü hütsü müire!

¹⁴¹Ih aikyahrü ko mükhimüngurü, ta Ihnü Nü adoba müpehjü.

¹⁴²Nü Amüsaba achangka müle, ko Nü yuzeng tsü lede yuje.

¹⁴³Chongcha ko alümxünü Ih jengko, ta Nü yuzengnü I khyang akünyang jüre.

¹⁴⁴Nü athülaba lede yuje; I khyang anyichehba jüng ko Ih lichehnung.

¹⁴⁵I lasih apümnü Nü te züdere; laling, ABÜDONGBA, ko Ihnü Nü yuzeng nyinung.

¹⁴⁶Ihnü Nü te züdere; Ih khümchoung ko Ihnü Nü yuzeng bichinung.

¹⁴⁷Mütsingsede Ih surore ko Nü yu la Ihnü longdire.

¹⁴⁸Nü athülaba la lümdhengnung; Ih müyüpsehchehre.

¹⁴⁹Nü amüthreba amüi la I yu nyijüng, O ABÜDONGBA, Nü yanglilüm la I kang rikieng.

¹⁵⁰Nü yuzeng mübichirü, I dhsümthserü amünyethsa role.

¹⁵¹Ta ABÜDONGBA, Nüh Ih amünyeh lile, Nü yuzeng apüm apampü lile,

¹⁵²Akhulangnü Ihnü Nü athülaba nyichehko; Nühnü arüh achangka müli lisohnung külüpko.

¹⁵³I chongcha dheng ko Ih khümchoung. tunüo Ihnü Nü yuzeng müpehjü.

¹⁵⁴Ih khüm ko Ih lehchehjüng; Nü anyengchoba kyo Ih khümchoung!

¹⁵⁵Amütsarüti mükhümchonung, tunüo arühnü Nü yuzeng mübichi.

¹⁵⁶Ta ABÜDONGBA, Nü yanglilüm amülah; yanglilüm ngung ko Ih khümchoung.

¹⁵⁷I rorüh ko nyüpmüsehrü khütang lile, ta Ihnü Nü yuzeng müpehjü.

¹⁵⁸Arahmütsarü hütsüri ngude, Ih wahcho, tunüo arühnü Nü yuzeng mübichi.

¹⁵⁹Dheng Ihnü Nü yuzeng khüdoi müiro, Nü amüi khodesü mümülichire, Ih khümchoung.

¹⁶⁰Nü yuzeng apüm tsü yuje, ko Nü Amüsa yukhaba apüm achangka müle.

¹⁶¹Arahkheh la yangthsarünü Ih becho, ta Ihnü Nü yuzeng drüre.

¹⁶²Kuthsi khütang lirü akünyang kyo, Nü anyengchoba khu Ih khütoh-i künyangro.

¹⁶³Ihnü arahkheh apüm thrünyire ko zongre, ta Ihnü Nü yuzeng müire.

¹⁶⁴Ihnü nyümong mükhu Nüh Amüsa yukhaba shulüm dhünyehpili Nü nengsere.

¹⁶⁵Nü yuzeng müirüti atsikehchah lile, ko arüh khülusohnungthsa tusü müle.

¹⁶⁶Ih khümchosohnung Nüh yingre, ABÜDONGBA, ko Nü yocho du Ihnü nguchire.

¹⁶⁷Ihnü Nü adoba bichire; I lasih apümnü hütsü müire.

¹⁶⁸Ihnü Nü yuzeng ko athülaba bichire; Ihnü nguchicho lüpcho Nühnü ngule.

¹⁶⁹I züdecho Nüh chihsohng, ABÜDONGBA. Nü anyengchocho roh-i, I khyang anyichehba jüng.

¹⁷⁰Ihnü kihchicho nyieng, ko Nü yu roh-i Ih khümchoung.

¹⁷¹Ihnü lede Nüh senung, tunüo Nü yuzeng tsü yuje.

¹⁷²Ihnü Nü yuzeng nengdang khi thsanung, tunüo Nü yuzeng tsü yuje.

¹⁷³Lede Ih rükunung khengyeng lieng, tunüo Ihnü Nü yuzeng bichire.

¹⁷⁴O ABÜDONGBA, Nü akhümcho shulüm Ih khütoh-i nahkoh thsaro! Nü yuzeng la I akünyang ngure.

¹⁷⁵Ihnü Nüh senungthsa, I khyang akang jüng; Nü thülabanü Ih troung.

¹⁷⁶Achahcho san kyo Ih thrüchire; Nü dikehrü ro yangching, tunüo Ihnü Nü yuzeng müpehjü.