Read Sangtam Naga NENGSEKHI 139 Bible Online

NENGSEKHI 139 - Sangtam Naga bible

NENGSEKHI 139

¹ABÜDONGBA, Nühnü Ih thsatsüko ko Ih müdhele.

²Nühnü I nguchi lüpcho müdhele; Nühnü ashu lanü I lümcho apüm müdhele.

³Ih nguchirü a kyahshangrünang Nühnü ngule; I nguchi apüm Nühnü müdhele.

⁴Ihnü müchoe, Ihnü tu yonungnang Nühnü müdhele.

⁵Nüh Ih mükangmüla lile; Nühnü Nü ziinü Ih tsungtire.

⁶Nü lümlong I nengdang dee asoh; Ihnü nyichehnung mükoh.

⁷Nü tenü Ih khüde rangnung? Nü licho lanü khüde tsiphunung?

⁸Ih ning chii küdu nye, Nüh hütsüla lile; Ih asülih lang züdu nye, Nüh hütsüla lile.

⁹Ih nyüchüro khu mong tsi nye mahkhang nyüzüdu chii wü li nye,

¹⁰hütsüla mii nü khehnü Ih nünung, ko nü kheh tsalangnü Ih shürinung.

¹¹Ama te Ih müshütinung mahkhang atsingse te ama kangnung Ihnü tsingdhengnung kohle,

¹²ta amasü Nü nengdanglü ama mah, ama tsüsü anyümong kyo atsingse lile. Nü nengdang ama ko atsingse sako du.

¹³Nühnü I lohla müipi thricho; Nühnü Itpa mi la Ih rirüta thricho.

¹⁴Ihnü Nüh sere tunüo Nüh drünungbae; Nü nguchi apüm asi ko anyemüyangnung. Hütsü I lasih apümnü müdhele.

¹⁵Khode I rühlungrü thricho, Itpa mi la athsalangnü chung licho, Ih hütsüla rang zide, Ih hütsüla licho Nühnü müdhecho.

¹⁶Ih müsuroedenü Nühnü Ih ngucho. I khyang nyümong khüdoi khasah jücho, arüh müdikeh-edenü, Nü vakha la thrahyoh licho.

¹⁷O Tsingrang, Nü lümchoti khüta thsidi; Hütsüri khütoh-i liro; Arüh khüdoi adrong!

¹⁸Hütsüri khidhengre langlü, lihpi tenü adrongu thsanung. Ih jesude, Ih adesü Nü te lire.

¹⁹O Tsingrang, amütsarüti changsohnyüre! Shüh khatohrü I tenü tsisohnyüre!

²⁰Arühnü Nü nengdang amütsa yore; arühnü Nüh nyüm amütsa chore.

²¹O ABÜDONGBA, Nü thrünyirü Ihnü thrünyire; Nü nyümrüti Ihnü nyümre!

²²Ihnü arüh thrünyitsatsare; Ihnü arüh I rorüh roh-i khichire.

²³O Tsingrang, Ih thsatsüng ko I lasih müdheing; Ih düzodheng ko I lümlong rangchehng.

²⁴I chah amünyi khürü dusü mülinang dhingdheng, ko müchangkaba lang la Ih nüng.