Read Sangtam Naga NENGSEKHI 145 Bible Online

NENGSEKHI 145 - Sangtam Naga bible

NENGSEKHI 145

¹Ihnü Nüh dicho sobhonung, I Tsingrang ko yangthsaba; Ihnü achangka müli Nüh senung.

²Nyümong mükhu Ihnü Nüh senung; Ihnü achangka müli Nüh senung.

³ABÜDONGBA tsü amülah ko dee senung athsalang; Abi diba tsü nyichehnung mükoh.

⁴Nü nguchiti shang khüdunü khüdu chii senung; arühnü Nüh akoh nguchi sobhonung.

⁵Arühnü Nü ahechi ko adhichi nengdang sobhonung, ko Nü anyemüyangnung nguchi Ihnü lümdhengnung.

⁶Nyitsarünü Nü akoh nguchi nengdang chonung, ko Ihnü Nü dicho sobhonung.

⁷Arühnü Nü tsacho nengdang chonung ko Nü amüi nengdang khi thsanung.

⁸ABÜDONGBA tsü amüi ko yanglilüm, zichüronung khai ko müthrehba amüinü jeng lile.

⁹Abinü atümung te tsare, ko Abinü thricho apüm müire.

¹⁰ABÜDONGBA, Nühnü thricho apümnü Nüh senung, ko Nü müyurü atümungnü Nü khyang anengse jünung.

¹¹Atümungnü Nüh akoh nguchi müdhenung ko Nü ahechi yanglih müdhenung nengdang,

¹²arühnü Nü ahechi, zii ko re nengdang chonung.

¹³Nü Yangthsathsaba achangka müle, ko Nüh lede nengdang Yangthsaba, ABÜDONGBAnü anyengchocho yuje yohpüre, ko Abinü nguchicho apüm atsa.

¹⁴Abinü chongcha la lirü trore; Abinü ngahseh lirü khamüsure.

¹⁵Akang liba apümnü Nü chah dhengre, ko arüh thsütahde Nühnü arüh khyang tsuyongba jüre.

¹⁶Nühnü arüh khyang kükyo jüre ko atümung thsütah kükyüjüre.

¹⁷ABÜDONGBA Nü nguchi apüm Amüsa, Abi nguchi apüm la yanglilüm lile.

¹⁸Abi te müsijo dsirü ko yuje la dsirü, apüm te amünyeh lile.

¹⁹Sürünü Abi dhichiro arüh thsütah Abinü chixire; Abinü arüh züdecho yuchire ko arüh khümchore.

²⁰Abi müirü atümung Abinü tsungtire, ta amütsarü Abinü changjünung.

²¹Ihnü ABÜDONGBA lede senung; akang apümnü Abi Amüsa neng achangka müli seing.