Read Sangtam Naga NENGSEKHI 147 Bible Online

NENGSEKHI 147 - Sangtam Naga bible

NENGSEKHI 147

¹ABÜDONGBA seing! Ihsa Tsingrang te nengsekhi thsanung tsü atsa; Abi senung tsü akünyangnung ko athsalang.

²ABÜDONGBAnü Jerusalem külüpchire; Abinü yangtsirü nüli rore.

³Abinü lasih thsa lirü kyangjüre ko arüh mathsa rümjüre.

⁴Abinü chenghiti khüdoinang khichehko, ko arüh müipi anengnü dsire.

⁵Ihsa ABÜDONGBA arangcheh ko akohba; Abi lümlong mükidhengcheh.

⁶Abinü alonglümrü dhimüsure, ta amütsarü alih chah kengkeh nyehre.

⁷ABÜDONGBA te mübü khi thsaang; Tbenglah bi Ihsa Tsingrang te khi thsaang.

⁸Abinü ning chah nyükhi khyangjüre; Abinü alih khyang tsing rosohre ko azong chah za chisohre.

⁹Abinü kanglungrü khyang tsuyongba jüre ko khüyahla zati khyang arüh khongde atsunung jüre.

¹⁰Abi akünyang tsü rezeh kuri chah, mahkhang rezeh rothsarü chah mah;

¹¹ta Abinü Abi dhichirüti chah künyangre, müthrehba amüi la longlangrüti chah künyangre.

¹²ABÜDONGBA seing, O Jerusalem! Nü Tsingrang seing, O Zion!

¹³Abinü nührü tbükhüm khümkhüm yohpüre; Abinü nührü müyurü müwajüre.

¹⁴Abinü nührü lurüh khümcho yohpüre ko fürü atsaubanü nührü chixire.

¹⁵Abinü alih khyang yuzeng jüre, ko Abinü tu yoro hütsü zah nguchire.

¹⁶Abinü shunbühshü kyo müdhrang sühsore ko lihwü kyo ii pohsohre.

¹⁷Abinü shurü lihza kyo müthehre; Abinü müthehba arüsahkünang tsü sünüsü mürangre!

¹⁸Hütsüde Abinü yuzeng jüre, ko ii tsü zünahre; Abinü nyübong müthehre ko kih pohsohre.

¹⁹Abinü müyurü khyang Abi yuzi, Abi athülaba ko Israel khyang yuzeng jüre.

²⁰Abinü yucho parü nengdang hi münguchi; arühnü Abi yuzeng mümüdhe. ABÜDONGBA seing!