Read Sangtam Naga NENGSEKHI 2 Bible Online

NENGSEKHI 2 - Sangtam Naga bible

NENGSEKHI 2

¹Tuepü yuchotinü nyüm yaro? Tuepü arühnü amükhyu rah külüpro?

²Yangthsarütinü nyümre, langnürütinü be müjangpü ABÜDONGBA ko Abinü throchehcho Yangthsaba nyüm arah külüpre.

³“Arüh yangthsathsaba lanü za linung, ko arüh pohki Ihsa mülinung” pü arühnü yore.

⁴Ninglang Yangthsaba pümji lanü ABÜDONGBAnü münyodhengre ko arüh rah müthsamünyüre.

⁵Hütsüde zichüro Abinü arüh te chotanung, ko Abi rihlongnü arüh drümüyangsohnung.

⁶Abinü yore, “Amüsa Zion Khang chah, I Yangthsaba pümsohko.”

⁷Yangthsabanü yore, “ABÜDONGBAnü tu seyohjücho Ihnü müdhesohnung. Abinü I te yocho, ‘Nüh I tsurü, chünye Ihnü nüh nümüsure.

⁸Ching, ko yuchoti apüm nü khyang jünung; Alimih apüm nüyo thsanung.

⁹Idhse janü nühnü arüh thsangnyangjünung; Nühnü arüh alih füh roh-i kengzangzangnung.’ ”

¹⁰Nührü Yangthsarüti, amüzahnung hi nyieng; Nührü limih yangthsarüti, yu hi nyichoung:

¹¹ABÜDONGBA dhridhriseh dikehng;

¹²dhridhrinü Abi jingte mükhukehng; mahkhang Abi zii zah chüronung ko nührü dhrongyengnü sünung. Khümchosohnung sürünü Abi yang würo arüh amüwanung.