Read Sangtam Naga NENGSEKHI 21 Bible Online

NENGSEKHI 21 - Sangtam Naga bible

NENGSEKHI 21

¹Yangthsaba tsü künyang lile, O ABÜDONGBA, tunüo Nühnü abi khyang suhre jüko; Abi künyangre tunüo Nühnü abi akoh ngusohko.

²Abi khyang abinü mürucho jüko; Abi kihchicho Nühnü lalingko.

³Amüwanung hipü Nühnü abi yang rocho ko hon kuthri athah chah thrijücho.

⁴Abinü Nü te akang, nyümong asheng ko kutsüpba chingcho, ko Nühnü jücho.

⁵Nühnü trocho khu abi ahechi arangcheh lile; Nühnü abi khyang nengkhong ko akoh jücho.

⁶Nü amüwa abi te lede lile ko Nüh zehchonü abi künyang lile.

⁷Yangthsabanü Akohba ABÜDONGBA chah longlangre; ko ABÜDONGBA amüthreba amüi khu abi lede khümcho linung.

⁸Yangthsabanü abi rorüti apüm kohchehnung; ko abi thrünyirü atümung abinü kohchehnung.

⁹Abi rode Abinü arüh tsü mihmüle la changjünung. ABÜDONGBAnü Abi rihlong la arüh münyopehnung ko michangnü arüh changjünung.

¹⁰Arüh trah süsü münyingnung; Yangthsabanü arüh kyüsehnung.

¹¹Arühnü abi nyüm lümchung ko rah külüpre, ta arühnü akoh müngunung.

¹²Abinü arüh chah tbüdengnü kyanung ko arüh shehli tsisohnung.

¹³Ihrünü Nüh sere, ABÜDONGBA, Nü tase arangcheh nengdang! Ihrünü khi thsa Nü zii senung.