Read Sangtam Naga NENGSEKHI 22 Bible Online

NENGSEKHI 22 - Sangtam Naga bible

NENGSEKHI 22

¹I Tsingrang, I Tsingrang, tuepü Nühnü Ih thrüchahchüpehro? Arüku ching müsi tohkeh trako, ta ade yingcheh I trorü mürore.

²Anyümong Ihnü Nü te dsicho, I Tsingrang, ta Nühnü mülaling; Aromang Ihnü dsicho, ta akyahshang müngu.

³Ta Nüh Amüsaba Khüdu kangsohko, Sü Israelrünü secho.

⁴Ihrü jümürünü Nü chah longlangcho; arühnü Nü chah yudsicho ko Nühnü arüh khümchocho.

⁵Arühnü Nü te züdecho ko dhsürü lanü tsiphucho; arühnü Nü chah longlangcho ko arüh mülongyücho.

⁶Ta adelü Ih nyitsarü khüdu mah; azah khüdu du, atümungnü mürimüso ko müchümükehre!

⁷Ih ngurü atümungnü Ih münyüjüre; arüh müleshücheh ko arüh ku ngahchire.

⁸“Sürü ABÜDONGBA chah ngakeh liro” arühnü yorü, “Tuepü Abinü nüh mükhümchoro? ABÜDONGBAnü nüh mürukhang, tuepü Abinü nüh mütroro?”

⁹Ih khümcho nümüsusohba tsü Nüh lile, ko Ih akhunga thsade, Ih khümcho yohpücho.

¹⁰I suro nyümong tinü Nü chah ngakeh rore, ko Nüh I Tsingrang thsa rore.

¹¹I tenü za tüli! Chongcha shündhün lile, ko atrorü süsü müle.

¹²Misüpung kyo münyehrü adrongnü Ih mükangtiko; Bashan lih lanü adrünung misüpung kyo arühnü Ih thsiti lile.

¹³Kihkhünying kyo arüh be khangthru I chah rengkehjüre.

¹⁴I tase kingkako, alih la kih tungpehcho kyo. I rüh apüm lohnahko; I lasih xa shenahcho kyole.

¹⁵I linga lihwü kyo kung lile, ko I müle I khüla chah tahkehko. Nühnü Ih lihwü la; asünung pehjüko.

¹⁶Füza mülungonü dhsiticho kyo, amütsa nguchirü mülungnü Ih mükangti lile; arühnü I jingkhehrü rehnahre.

¹⁷I rühlungrü du trümchehko. I münyehrütinü nahingkeh I chah khakhu dhengre.

¹⁸Arühnü I jengki nengdang zii thsadhengnü arüh yola changtare.

¹⁹O ABÜDONGBA, I tenü za tütsi! Ih khümchonung zah rung!

²⁰Nohsheng chahnü Ih khümchoung; füza hiri chahnü I kang khümchoung.

²¹Kihkhünying hiri chahnü Ih khümchoung; Rangmü misüpung hiri bete I alongdi müle.

²²Nü nguchi nengdang I müyurüti te yonung; arüh ashimükhong la Ihnü Nüh senung:

²³“Abi seing, nührü ABÜDONGBA dikehrüti! Abi dhiching, nührü Jakob trah! Abi mübüng, nührü Israelrüti!

²⁴Abinü ailümrü müpehjü mahkhang arüh chongcha müdheng müle; Abinü arüh tenü müximüla, ta arühnü dside lalingre.”

²⁵Nü nguchi nengdang ashimükhong arangcheh la Ihnü Nüh senung; Nü mübürüti licho la Ihnü nyengchocho kangmübü jünung.

²⁶Ailümrünü tsuxah tsunung; sürü ABÜDONGBA yang roro arühnü Abi senung. Arüh müchangkapü müwasohng!

²⁷Yuchoti apümnü ABÜDONGBA lümchehnung. Liküp lanü Abi yang ronung; ahung apümnü Abi mübünung.

²⁸ABÜDONGBA tsü Yangthsaba, ko Abinü yanglihti michah yangthsare.

²⁹Amüthsehrü atümungnü Abi jingte mükhukehnung; asüba nyitsarü atümungnü Abi jingte mükhukehnung;

³⁰Aronung shangtinü Abi dikehnung; nyitsarünü aronung shang te ABÜDONGBA nengdang yonung.

³¹Mükhoh la zehrü te yonung: “ABÜDONGBAnü Abi nyitsarü khümchoko.”