Read Sangtam Naga NENGSEKHI 27 Bible Online

NENGSEKHI 27 - Sangtam Naga bible

NENGSEKHI 27

¹ABÜDONGBA tsü I atsingse ko I akangcheh; Ihnü süsü müdrünung. ABÜDONGBAnü dhsürü apüm lanü Ih tsungtire; Ihnü khodesü müdrünung.

²Amütsarünü Ih thsiti kyüsehnung müküpde arüh müthikehre ko khülure.

³Rothsarü atümungnü Ih mükangti nye, Ihnü müdrünung; Arorühnü Ih be nye, Ihnü mütozah Tsingrangba chah longlangnung.

⁴Ihnü ABÜDONGBA te lang khüdu nengdang kihchiko; Ihnü lang khüdu du khyünyüre: ABÜDONGBA kuhla I kang ayung linung, Abi tsacho shulüm nyemüyangnung, ko Abi anyahba shulüm kihchinung.

⁵Thsangthside Abinü Ih tsikehsohnung; Abinü amübükuh la Ih khümcho yohpünung ko lung athseng chah Ih tsikehsohnung.

⁶Hütsünü I mükang liba arorühti michah akoh ngunung. Amübükuh la akünyangnü züde kangmübü jünung; Ihnü khi thsanung, Ihnü ABÜDONGBA nengsenung.

⁷ABÜDONGBA, Ihnü dside nyieng, Yanglilüm ko I te laling!

⁸“Rung ko mübüng,” pü yode, “Ih ronung, ABÜDONGBA,” pü Ihnü lalingcho;

⁹I te Nü romih türangkhu! I te zii tüchüro; Nü dikehrü ximüla tütsisoh. Nüh I trorü thsacho; Ih tüpehjü, Ih tüthrüchahchüpeh, O Tsingrang, I khümchobong.

¹⁰Iu ko I tpanü Ih thrüchahchüpehnung kohle, ta ABÜDONGBAnü Ih xükümnung.

¹¹ABÜDONGBA, tu nguchisohnyüro, I te doung, ko lang tsa la Ih nüng, tunüo I münyehrü khütango lile.

¹²I rorüh sürünü arahkheh ko adrübanü Ih bede, Ih tüpehjü.

¹³Hiba akang la Ihnü ABÜDONGBA atsaba tsü ngunungthsa linungepü Ihnü müdhele.

¹⁴ABÜDONGBA chah longlang. Rezehng ko lasih zieng. ABÜDONGBA chah longlang.