Read Sangtam Naga NENGSEKHI 31 Bible Online

NENGSEKHI 31 - Sangtam Naga bible

NENGSEKHI 31

¹ABÜDONGBA, atsungti yangchi Ih Nüh yang rore; Ih ashah tükhyüsoh. Nüh Amüsaba Tsingrang; Ih khümchoung, Ihnü kihchire.

²I te nyijüng! ade Ih khümchoung! Ih tsungtinung I tsikehchah Nüh thsaang; I khümchonung Nüh I khümrü thsaang.

³Nüh I tsikehchah ko I khümrü; Nü anyengchocho kyo Ih nyahng ko nüng.

⁴I khyang thsapüjüba zeng lanü Ih khümchoung; dhsürü la Ih tsikehsohng.

⁵Nü khehla I nbü jüre; Nühnü Ih khümchonung, ABÜDONGBA; Nüh longlangchehba Tsingrang.

⁶Arahkheh tsingrang mübürüti Nühnü thrünyire, ta Ihlü Nü chah longlangre.

⁷Nüh müthrehba amüi nengdang Ih künyangnung ko longphinung. tunüo Nühnü I chongcha ngule; ko I thsangthsi müdhele.

⁸Nühnü arorüh khehla Ih müjü; Nühnü I jing thangchi jükehsohko.

⁹I te yanglilüm, ABÜDONGBA, tunüo Ih athsangthsi la lile; dira trachonü I nahküp bümre; Ih kyahsehpehko.

¹⁰Longrichonü Ih kingkako, ko trachonü I kang khisohko. Thsangthsichonü I tase müzeh; I rühlungrü mii kungpehko.

¹¹I rorüti, ko alathsa I kurümrütinü Ih mülangjo bichire; I shangrünü Ih drüre; Yanglong la Ih ngude arühnü rang tsire.

¹²Ih sopehcho kyo, atümungnü Ih nbüchopehko; Ih apehcho kohro khüdu kyo lile.

¹³Arorühti rang chotacho Ihnü yuchire; Dhsürünü Ih mükangdipüle. Ih nyüm arühnü lümchung chungre, I mapsehnung arah külüpre.

¹⁴Ta I alongdi Nü chah lile, O ABÜDONGBA; Nüh I Tsingrang.

¹⁵I bekhyah Nü khehla lile; I rorüti ko I dhsümthserü kheh lanü Ih khümchoung.

¹⁶Nü dikehrü chah müi dheng; Nüh amüthreba amüi la Ih khümchoung.

¹⁷Ihnü Nü te züdere, ABÜDONGBA; Ih ashah tükyüsoh. Amütsarü ashah khyüsohng; asü lih yang arüh naying züdusohng.

¹⁸Amüthsehrü ko hongzirü sürünü amüsarü mülangjo choro hiri arahkhehrü atümung be hümtijüng.

¹⁹Nü jengreng drürü khyang yohpüjüba kohro atsa tsü khüta anyemüyangnung! Nüh khütoh-i atsa atümungnü müdhele, Nü chah longlangrü khüta aringnung müli khümcho liro.

²⁰Nühnü nyitsarü rah lanü arüh rang khümcho yohpüre; arüh rorüh müthsamünyü lanü Nühnü arüh tsikehsoh yohpüre.

²¹ABÜDONGBA seing! Ih mükangtipü thsakehjüde, Abi anyemüyang amüi khütoh-i I te ngucho!

²²Abi tenü Ih pehkopü dronü lümcho. Ta Ihnü arüku nengdang züdede Abinü I züdecho yuchicho.

²³Nührü amüsarütinü ABÜDONGBA müing. ABÜDONGBAnü amüsarü tsungtire, ta amüthsehrü arüh aleng Abinü khingchire.

²⁴Rezehng, müsi mülahng, ABÜDONGBA chah longlangrü apüm.