Read Sangtam Naga NENGSEKHI 33 Bible Online

NENGSEKHI 33 - Sangtam Naga bible

NENGSEKHI 33

¹Nührü Amüsarü atümungnü ABÜDONGBAnü tu nguchicho, hütsü nengdang akünyangnü züdeing; Abi yocho nyirü atümungnü Abi seing.

²ABÜDONGBA khyang tbenglah bi nengse jüng, abi te tbenglah bi khi thsaang.

³Abi te khi asi khüdu thsaang, akünyangnü züde tbenglah sihthsa tiinü thsaang.

⁴ABÜDONGBA yu tsü yuje ko Abi nguchi apüm alongdinung.

⁵ABÜDONGBAnü tu Amüsa ko yuje hütsü müire; Abi amüthreba amüinü alimih jengko.

⁶ABÜDONGBA yuzeng khu ning külüpcho, nyü, chonu ko chenghiti Abi yunü külüpcho.

⁷Abinü kihdi apüm müdüm khüdu la khyübülungcho; Abinü kihjü asoh alih yonglang khangtire.

⁸ABÜDONGBA drüng, limih apüm! Abi dhiching, liküpnü!

⁹Abinü chode, limih thricho; Yuzeng jüde lüpcho chürocho.

¹⁰ABÜDONGBAnü yanglihti alümcho jinyangjüre; arüh lümchung hitsinung lanü Abinü yatire.

¹¹Ta Abi lümchung müchangkapü lire; Abi lümcho shang apüm la linung.

¹²Khüiba yucho Tsingrang ABÜDONGBAliro, arüh akünyangnung; nyitsarü sürü Abi yo thsanung throchehcho, arüh akünyangnung!

¹³ABÜDONGBAnü ninglangnü dhengchahchüre; ko amüi tsurü atümung ngure.

¹⁴Abi lichahnü, Abinü limih chah lirü apüm chah dhengre.

¹⁵Abinü arüh lümlong thrijüre, ko arühnü nguchicho lüpcho müdhere.

¹⁶Yangthsarünü rothsarü thrungchonü akoh müngure; Rothsarü khüdunü abi suzehchonü akoh müngure.

¹⁷Akoh nengdang khata kuri akhyüchah müle, arüh rezehchonü mükhümchonung.

¹⁸ABÜDONGBAnü Abi te nyirü ko sürünü Abi amüthreba amüi la longlangro arüh dhengyehre.

¹⁹Abinü asünung lanü arüh khümchore; ko yangkong lanü arüh khümcho yohpüre.

²⁰Ihrünü ABÜDONGBA chah alongdi yohpüre; Abi Ihsa tsungtirü ko atrorü.

²¹Abi nengla Ihsa künyangre, Abi Amüsa nengla Ihsanü longlangre.

²²ABÜDONGBA, Nü chah ihrü alongdi yohpüde, Nü amüthreba amüi ihrü te lisohng.