Read Sangtam Naga NENGSEKHI 34 Bible Online

NENGSEKHI 34 - Sangtam Naga bible

NENGSEKHI 34

¹Ihnü lede ABÜDONGBA senung; Ihnü Abi seba müzahnung.

²Abinü tu nguchicho hütsü nengdang Abi senung; sehtirü atümungnü nyieng ko künyang.

³I te müjang ABÜDONGBA dicho sobhoung; Ihsanü müjang Abi nengsenung.

⁴Ihnü ABÜDONGBA te kihchicho ko Abinü I te lalingcho; Ih adrünung apüm lanü Abinü lehchehcho.

⁵Sehti lirünü Abi chah dhengre ko künyangre; arüh khodesü müwahnung.

⁶Ailümrünü Abi te dsire, ko Abinü lalingre; Abinü arüh thsangthsi apüm lanü khümchore.

⁷Abi riwürünü Abi te nyirüti nyahre, ko arüh dhsürü lanü khümchore.

⁸ABÜDONGBA tsü khüta atsa nü jangjang müdheing. Abi chah tsikehrü akünyangnung.

⁹ABÜDONGBA dhiching, nührü Abi müyurüti; Abi te nyirü khyang arüh thsütah apüm jüre.

¹⁰Tsuyongba müdsimükuchonü kihkhünying mii khongre, ta sürünü ABÜDONGBA te yocho nyiro arüh atsa tunüsü mümüdsinung.

¹¹Rung, I tsurüti, I te nyieng, ABÜDONGBA dhichinung Ihnü nührü te donung.

¹²Akang künyang linung khyünyürü do? Kutsüp ko akünyang khyünyürü do?

¹³Hütsükhang amütsa ko arahkheh chonung lanü nyehlieng.

¹⁴Amütsa lanü ximülang ko atsa nguching; nü lasih apümnü yangtsa yangching.

¹⁵ABÜDONGBAnü Amüsarü dhengyehre ko arühnü züdecho nyire;

¹⁶ta amütsa nguchirü Abinü yatire, hütsünü arüh süde, arüh zah nbüchopehnung.

¹⁷Amüsarünü ABÜDONGBA te züdere, ko Abinü nyire; Abinü arüh thsangthsi apüm lanü khümchore.

¹⁸Suzah lirü te ABÜDONGBA shündhün lile; alongdi mülirü atümung Abinü khümchore.

¹⁹Nyitsarü atsa chongcha adrong mütohre, ta hütsüri apüm lanü ABÜDONGBAnü abi khümchore.

²⁰ABÜDONGBAnü abi rikire; abi rüh khüdusü müthsangnyangnung.

²¹Amütsarü amünyinü mapsehnung; Amüsaba thrünyirü khingchinung.

²²ABÜDONGBAnü amüyurüti khümchonung; Abi yang tsungtisohnung würüti khümchonung.