Read Sangtam Naga NENGSEKHI 35 Bible Online

NENGSEKHI 35 - Sangtam Naga bible

NENGSEKHI 35

¹Ih nyümrü Nühnü nyüm, ABÜDONGBA. I nyüm khatarü te Nühnü khataang.

²Nü tsung ko thsunohrü bipü Ih rerechonung rung.

³Ih iichirü nyüm Nü thsuh dhimüsung. Nühnü Ih khümchonungepü I te young.

⁴I kyüsehnung yangchirü Nühnü kohchehng ko shahsohng! Ih nyüm rah külüprüti ximüla lümdhamasohng!

⁵ABÜDONGBA riwürünü arüh iichide, nyübongnü fotsiba manying kyosohng!

⁶ABÜDONGBA riwürünü arüh xüptsude, arüh lang marürah ko shüshehsohng!

⁷Mülang tu mülipü arühnü I khyang zeng thsajücho, ko Ih rangnung mütrüm jucho.

⁸Ta arühnü hütsü mümüdhede athsangnyangnü arüh bhünüpnung; arühbürü uzathsa la arüh xohnung ko arüh changnung!

⁹Hütsüde ABÜDONGBA nengla Ih künyangnung; Ih künyangnung tunüo Abinü Ih khümchoko.

¹⁰I lasih apümnü ABÜDONGBA te yonung, “Nüh kyo süsü müle. Nühnü athrungrü chahnü suh müzehrü, ko akhingchirü chahnü ailümrü tsungtire.”

¹¹Amütsa nyitsarünü Ih nyüm yuzi jüre ko Ihnü mümüdheba thsamehcho shulüm Ih mülangjüre.

¹²Arühnü I khyang atsa mülih amütsa jüre, ko I lüm chahpehre.

¹³Ta arüh füthsade, Ih meshü jengki khyücho; Ihnü Ipu jangjang kongcho;

¹⁴Shangrü mahkhang jünirü khüdu nengdang roh-i, Ihnü I thah mükhurang dangkhidangnangcho. Atpa nengdang meshücho kyo Ihnü mükhupü mesho rachicho.

¹⁵Ta Ih chongcha la lidelü, Ih münyodhengnung arüh atümung künyang shibülungcho; Shirünü I chah lahcho ko xüp-du-xüpcho.

¹⁶Jahloh-hilohrü münyodhengcho kyo, arühnü Ih thrünyinü dhengcho.

¹⁷ABÜDONGBA, Nühnü khüdoi chah dheng du linung? Arühnü iichicho lanü Ih khümchoung; hiri kihkhünying chahnü Ih khümchoung!

¹⁸Hütsüde Nü müyurü ashimükhong la Ihnü Nüh senung; Arüh atümung bete Ihnü Nüh senung.

¹⁹I münyehrüti, arahkhehrü khyang Ih tükohsoh. I alongri michah tu yuzi mülipü I thrünyirü khyang nahxitbengnü Ih tüdhengsoh.

²⁰Arühnü athsalangnü müchore; ta yangtsa müirü nyüm yu alang alang dochehjüre.

²¹Arühnü Ih mülangjo züde yore, “Nühnü nguchiba tsü ihrünü nguko!”

²²Ta, O ABÜDONGBA, Nühnü hi nguko. Hütsüeko sahmüthsa tüli, ABÜDONGBA; I tenü ashu tüza!

²³Mühachieng, ABÜDONGBA, ko Ih khüm; Shemüsung, I Tsingrang, ko I shulüm kihchijüng.

²⁴Nüh Amüsaba, O ABÜDONGBA, Ih achomükehcho sobhojüng; I michah I rorüh tükünyangsoh.

²⁵Arüh khyang hita tüchosoh, “Ihrünü abi kohko! Hütsü ihrü khyünyücho!”

²⁶I chongcha ngu künyangrü tsü khüdupinü kohjüng ko lümdhamasohng; I tenü atsauepü yorüti tsü ashah ko awahnü jengsohng.

²⁷Ih langsohnung lümrü khyang loli loli akünyangnü hita züdesohng, “ABÜDONGBA khüta amülah! Abi dikehrü akoh ngucho la Abi künyangre.”

²⁸Hütsüde Nüh Amüsaba shulüm Ihnü sobhonung. ko nyümong chang Ihnü Nüh senung.