Read Sangtam Naga NENGSEKHI 38 Bible Online

NENGSEKHI 38 - Sangtam Naga bible

NENGSEKHI 38

¹O ABÜDONGBA, Nü zichüronü Ih tükhingchi!

²Tbüdengnü Nühnü Ih thsakehjüko; Nühnü Ih xüptsuko.

³Nü zichürochonü Ih dee thsale; I münyi khu Ifü apüm adhsa-aranü jengko.

⁴I münyi I thah chah tuwüko; I nengdang bhamüling hi dirale.

⁵Ih dohchonü I mathsa sühre ko xümre.

⁶Ih kohthsüko ko jamtpahko; Ih mükhyang longrire.

⁷I füthsacho trüpsehre, ko Ih sünungthsare.

⁸Ih kyahpehko ko jamtpahko; I lasih mükyahshangchehnü rühchire.

⁹O ABÜDONGBA, I mükhyahcho Nühnü müdhele; I rühchicho Nühnü yuchile.

¹⁰I lasih thüthohre, I tase thümpehko, ko I nah la avisa changpehko.

¹¹I mathsa thsachonü I shangrü ko kurümrüti I amünyeh mürore; tsutpurünü mii Ih mürire.

¹²I mapsehnyürünü zeng thsapüjüre, I thsakehjünyürünü Ih changjünung mütichire; Ih nyüm rah külüpba müzahre.

¹³Ih anangtbengrü roh-i müyuchire, müle jahrü kyo müchochehre.

¹⁴Ih anangtbengrü kyo mülalingre, tunüo abinü müyuchire.

¹⁵Ta Ihlü Nü chah longdire, O ABÜDONGBA, O ABÜDONGBA I Tsingrang, Nühnü I te lalingnung.

¹⁶I wahcho ngu I rorüti tükünyangsoh; I khülucho ngu arüh tümüthsehsoh.

¹⁷Ih akhülurüe ko I tohthsa müzahre.

¹⁸Ihnü mülang nyengchore; I münyi nengdang wah lümre.

¹⁹I rorüti akhümkhüm ko re azeh; yuzi mülipü I thrünyirü khütang lile.

²⁰Atsa mülih amütsa jürünü Ih nyümre, tunüo Ihnü yuje du nguchinung lümre.

²¹Ih tüthrüchahchübeh, O ABÜDONGBA; Ih tüpehjü, I Tsingrang!

²²Ade Ih troung, O I Kangchehjüba ABÜDONGBA!