Read Sangtam Naga NENGSEKHI 40 Bible Online

NENGSEKHI 40 - Sangtam Naga bible

NENGSEKHI 40

¹Ihnü ABÜDONGBA arüku nengdang rangcho yingcho; hütsüde Abinü I te nyicho ko züdecho yuchicho.

²Abinü adrünung shukuh lanü ko adhsürü chongbong lanü Ih tphahchehcho. Ko Abinü lung khüdu michah yasoh ko khümcho yohpücho.

³Abinü I te khi asi khüdu docho, Ihsa Tsingrang nengsekhi. Hi ngurü adrongnü müzahnung ko ABÜDONGBA chah longlangnung.

⁴Sürünü ABÜDONGBA chah yudsiro, sürünü kyothri yang müximülaro mahkhang arahkheh tsingrang mübürü yola müzehro arüh akünyangnung.

⁵O ABÜDONGBA ihrü Tsingrang, ihrü nengdang nühnü khütang nguchiko; Nüh kyo süsü müle! Nühnü ihrü nengdang anyemüyangnung lümchung adrong nguchiko. Ihnü hütsüri nengdang müchokhang arüh tsü drongrale!

⁶Nühnü kangmübü ko amübü mükhyünyüre; Münyi pehnung Nühnü bholu chah kanglungrü tahnung ko kangmübü müching. Ta Nühnü I khyang yuchinung nangku jüko.

⁷Hütsünü Ihnü lalingcho, “Ih hila lile; I nengdang Nü athülaba tsü Yuzeng vakha la lile.

⁸Nü lümcho nguchinung Ihnü khütoh-i müiro, I Tsingrang! Ihnü Nü docho I lasih la yohpüre.”

⁹ABÜDONGBA, Nü müyurü shimükhongde, Nühnü ihrü khümchocho yusi atsa Ihnü yocho. Ihnü mütozah hütsü nengdang yonungepü Nühnü müdhele.

¹⁰Ihnü akangcheh yusi tsü rang müyohbü; Ihnü Nü yuje ko arüku nengdang lede chocho. Nü müyurü ashimükhong la Nüh yuje ko müthrehba amüi nengdang müchopü müle.

¹¹ABÜDONGBA, Nü yanglilüm I tenü tükhyümüi. Nü amüthreba amüi ko yujenü Ih lede riki yohpüng.

¹²Chongcha khütango, mükhilongnü Ih mükangtiko! I münyinü Ih bhünüp-pehko, ko Ihnü ngunung mükohre; arüh I thah chah kuva tenü adrongu, ko I longdi changpehko.

¹³Ih khümchoung, ABÜDONGBA! Ih ade troung!

¹⁴I mapsehnung müküprüti sehchi kohjüng ko lümdhamajüng. I chongcha ngu künyangrüti ximülasohng ko wahsohng.

¹⁵Ih müthsamünyüjürüti kohjüng ko nyekasohng.

¹⁶Nüh yang rorüh atümung, künyangsohng ko longphisohng. Nü akangcheh nengdang anengse jürü atümungnü “ABÜDONGBA khüta amülah,” pü lede yosohng.

¹⁷Ih re müzeh ko ailümrü, O ABÜDONGBA, ta Nühnü Ih münbüchü. Nüh I khümchorü ko I Tsingrang dhsüthsa ro Ih troung!