Read Sangtam Naga NENGSEKHI 42 Bible Online

NENGSEKHI 42 - Sangtam Naga bible

NENGSEKHI 42

¹Shümüshünü kihnatung nahmürahcho kyo, Ihnü Nüh mükhyahre, O Tsingrang.

²Ihnü Nüh mükhyahre, akang liba Tsingrang; khode Ih ro Nüh mübünung?

³Ama atsingse Ih trare, I tsuyongnung tsü nahshükih du; müjangmüji I rorütinü “Nü Tsingrang khüde liro?” pü I te tsingdhengre.

⁴Atsicho bekhyah lümchehde I lasih thsangnyangre, khode Tsingrangba kuh lang amülung yola arüh nüpü yanglongdse wücho, mülung khüdunü khithsa züde Tsingrangba secho.

⁵Tuepü Ih hitoh-i longriro? tuepü Ih hitoh-i chongcharo? Ihnü Tsingrangba chah I longdi yohpünung, ko adesü Ihnü I khümchobong, I Tsingrang nengsenung.

⁶Ih yangtsi hila I lasih thsangnyangre, hütsünü I lümlong Abi yang ximülare. Abinü I nbü la alongri kiloh müthehcho;

⁷Hermon khang ko Mizar khang lanü Jordan yang kihsasa ningki jürocho kyo, I chah kihloh kyo lümdhamanü rengkehjüre.

⁸Ihnü aromang khi thsanung ko I kang Tsingrang khyang dangkhidangnang khüdu jünungthsa, ABÜDONGBAnü anyümong Abi amüthreba amüi ngusohng.

⁹I khümrü Tsingrang te Ihnü yore, “Tuepü Nühnü Ih nbüchücho? I rorüh amütsa khehla tuepü Ih hita chongchanung?”

¹⁰Arühnü lede I te, “Nü Tsingrang khüde liro?” pü tsingdheng nyüpmüseh Ih khingchire.

¹¹Tuepü Ih hitoh-i longriro? Tuepü Ih hitoh-i chongcharo? Ihnü Tsingrangba chah I longdi yohpünung ko adesü Ihnü I khümchobong I Tsingrang nengsenung.