Read Sangtam Naga NENGSEKHI 44 Bible Online

NENGSEKHI 44 - Sangtam Naga bible

NENGSEKHI 44

¹Ihrü nangkhinü hütsü yuchicho, O Tsingrang, papade arüh bekhyah la Nühnü tu nguchicho;

²Nühnü khüta müyudsirüti iipehpü arüh lih la Nü nyitsarüti pehjücho; ko aparü yuchoti khüta khingchipü Nü müyurü müwajücho, hütsü ihrü jümürünü ihrü te yoko.

³Nü nyitsarütinü arüh thsunohrünü alih tsü mümahcheh; arühbürü tasenü hütsü mükoh; ta Nü zii ko tasenü, Nühnü arüh müicho, Nüh zehcho khu ngusohcho.

⁴Nüh I Yangthsaba ko I Tsingrang; Nü müyurü khyang Nühnü akoh jüre,

⁵ko Nü ziinü ihrü rorüh kohcho.

⁶Ihnü Ipu khümchonung Singthsalu ko I thsunohrü chah longmülangre;

⁷ta Nühnü arorüh kheh lanü ihrü khümchocho ko ihrü thrünyirü kohjücho.

⁸Ihrünü lede Nüh senung ko müchangkapü Nü khyang anengse jünung.

⁹Ta ade Nühnü ihrü mükhyücho ko ihrü kohchehsohko; Nühnü adelü ihrü rothsarü yola müwü.

¹⁰Nühnü ihrü rorüh bete tsisohko, ko arühnü ihrü yo khyüko.

¹¹San kyo Nühnü ihrü kyüsehsohko; limih palang ihrü shupishuzasohko.

¹²Nühnü Nüpu müyurüti arüh amii aikyah duepü lüm, shiyüp iko.

¹³Nühnü ihrü te tu nguchicho hütsü kurümrünü ngure, ko arühnü ihrü chah müthsamünyo münyodhengre.

¹⁴Yuchoti yola Nühnü ihrü ashusha khüdu kangsohko; arüh ku ngahchi ihrü chah münyodhengre.

¹⁵Ih lede mihmüxüpre; I rorüh ko I thrünyirütinü

¹⁶mükhimüngu nyüpmüsehcho yuchi Ih shahsehre.

¹⁷Ihrünü Nüh münbüchü ko azengtacho müthsangnyang nye, hiri apüm ihrü chah tikehko.

¹⁸Ihrünü Nü yocho münyi müle; Nü yuzeng münyipü müle.

¹⁹Ta Nühnü rangmü kanglungrü yola ihrü atrorü müli pehjüko; Nühnü ihrü amarürah asoh la tsongpüko.

²⁰Ihrünü ihrü Tsingrang mümübüpü yangpirü tsingrang mübürelang,

²¹Nühnü hütsü rangchehpü libae, tunüo Nühnü ihrü arang lümlong müdhele.

²²Ta Nü khyanglangnü shikhe apüm la ihrü mapsehre ko amapsehba san kyo ihrü bichire.

²³Jesung, ABÜDONGBA! Nüh tuepü yüpjoro? Nü jangjang surung! Achangka müli ihrü tüpehjü!

²⁴Tuepü ihrü tenü rang liro? ihrü chongcha ko thsangthsi tünbüchü!

²⁵Ihrü alih la thungsehko; ihrü asongsong la khülu jore.

²⁶Nüh ihrü tronung rung! Nüh amüthreba amüi khyanglangnü ihrü khümchoung!