Read Sangtam Naga NENGSEKHI 51 Bible Online

NENGSEKHI 51 - Sangtam Naga bible

NENGSEKHI 51

¹I te yanglilüm, O Tsingrang, Nüh amüthreba amüi shidüm. Nü yanglilüm amülahnü I münyiti nipehjüng!

²I münyiti apüm thsüthohjüng ko I münyi lanü müsachehjüng!

³I thsamehcho Ihnü müdhele; Ihnü lede I münyi lümkehle.

⁴Ihnü Nüh nyüm, Nüh du nyüm, amünyi shitpahko, ko Nühnü amünyi khichiba Ihnü nguchiko. Hütsüeko Nühnü I yu khanung tsü athsalang, Ih mülangjüba tsü Nüh athsalang.

⁵Dheng, Ih amünyi la hirocho, ko amünyi la I tpanü Ih longla hicho.

⁶Nühnü thsütahba tsü müsi jüba ko yuje tsü lile; Nü lümlongnü I lasih jengjüng.

⁷I münyi pehjüng ko Ih müsa linung; Ih thsüthohjüng ko Ih shurü tenü athru-u kangnung.

⁸Akünyang ko alongphi yuva tsü I khyang yuchisohng; ko Nühnü Ih münohnah ko thsangnyang jünye, Ih anyüpiu künyangnung.

⁹I münyi chah tüdheng ko I amütsa apüm nipehjüng.

¹⁰I chah lasih asi khüdu thrijüng, O Tsingrang, ko I chah lasih asi ko yocho nyiba anbü yohjüng.

¹¹Nü tenü Ih tüipeh; I chahnü Amüsa anbü tükhyümüi.

¹²Nüh akangcheh lanü roba akünyang I khyang thali jüng, ko Ihnü Nü yocho nyisohng.

¹³Hütsüde Ihnü münyirü te Nü yuzeng donung, ko arühnü Nüh yang ximülanung.

¹⁴Ih ditpang! O Tsingrang, ko Ih khümchoung, ko Ihnü künyangseh Nüh Amüsaba sobhonung.

¹⁵Ihnü chonung troung, ABÜDONGBA, ko Ihnü Nüh senung.

¹⁶Nühnü kangmübü mükhyünyüre, ama, Ihnü jünung kohle; trüp mübü la Nühnü mükünyangre.

¹⁷I kangmübü tsü alonglüm anbü, O Tsingrang; alonglüm ko thsamülacho lasih Nühnü müthsonglinung.

¹⁸O Tsingrang, Zion müing ko abükyü troung; Jerusalem tbü külüpchijüng.

¹⁹Hütsüde yuje kangmübü ko ihrü trüp mübüba la Nüh künyangnung; ko Nü bholu chah misüpung kangmübü jünung.