Read Sangtam Naga NENGSEKHI 59 Bible Online

NENGSEKHI 59 - Sangtam Naga bible

NENGSEKHI 59

¹I rorüh kheh lanü Ih khümchoung, I Tsingrang; I betirü chahnü Ih tsungtieng!

²Amütsarü kheh lanü Ih khümchoung; mapsehrü kheh lanü Ih rerechoung!

³Dheng! arühnü Ih mapsehnung yingle; akhürahrüti Ih nyüm shibülungle; I münyi ko thsamehcho ngang mah, O ABÜDONGBA,

⁴I chah tu mülang mülipü arühnü tsokhuta Ih bere. Shemüsung, I tronung rung, ko dheng!

⁵Nüh, ABÜDONGBA Akohba, Israel Tsingrang. Surung ko yanglihti khingching; Amütsa lüm thsüyohchürü te yanglilüm tüngu.

⁶Arühnü anyüzehlang thali rore, arühnü yangdi la tsü füza kyo reng rachire.

⁷Arühnü nyüpmüseh ko thsüyohchücho yu tsü nyidheng. Arüh be la arüh müle tsü nohsheng kyole, ta sünüsü müyuchi pü arühnü lümre.

⁸Ta Nühnü arüh münyodhengre, ABÜDONGBA; Nühnü müyudsirü atümung müthsamünyüre.

⁹Nü re la I longlangre; Nüh I tsikehchah, O Tsingrang.

¹⁰I Tsingrangnü Ih müire ko Ih yang ronung; I rorüti kohchehcho Abinü I khyang ngusohnung.

¹¹Arüh tümapseh, O Tsingrang, mahkhang I nyitsarütinü nbüchünung. Nü renü arüh kohpü shupishuzasohng, O ABÜDONGBA, ihrü tsungtibong.

¹²Arüh beküp la amünyi lile; arüh yu apüm amünyi du; arüh müthseh la arüh rangsohng! tunüo arühnü chokehcholare ko rahkhehre,

¹³Nü zichüro arüh changjüng; arüh riri changjüng. Alimih achangchinü Tsingrangbanü Israel la yangthsarepü nyitsarü atümungnü müdhenung.

¹⁴I rorüti anyüzehlang thali rore. Arühnü yangdilang füza kyo reng rachire.

¹⁵Füzanü tsang yangchi rachipü mi müjengkhang rengcho kyole.

¹⁶Ta Ihlü Nü tase nengdang khi thsanung; Nüh amüthreba amüi nengdang nyangnyü mükhu Ihnü züde khi thsanung. Nüh I tsikeh chah thsacho, Ih thsangthside tsikehsing.

¹⁷Ihnü Nüh senung, I khümrü. I tsikehsing tsü Tsingrangba, Tsingrangba sünü Ih müiro.