Read Sangtam Naga NENGSEKHI 66 Bible Online

NENGSEKHI 66 - Sangtam Naga bible

NENGSEKHI 66

¹Nyitsarü atümungnü akünyangnü züde Tsingrangba seing!

²Abi neng ahechi khi thsaang; ahechi nengse Abi khyang jüng!

³“Nü nguchiti khüta anyemüyangnung pü Tsingrangba te young! Nü zii dirachonü Nü rorütinü dhridhri Nü jingte mükhukehre.

⁴Limih chah lirü atümungnü Nüh mübünung; arühnü Nü te nengsekhi thsanung, arühnü Nü nengsekhi thsanung.”

⁵Rung ko Tsingrangba nguchiti dheng, nyitsarü yola Abi anyemüyangnung nguchiti dheng.

⁶Abinü kihdi alih akung kangsohcho; Ihsa jümürünü jingnü yongkhi tsü kehcho. Hütsüla Abinü nguchicho la Ihsanü künyangtacho.

⁷Abinü müchangkapü Abi renü yangthsare, ko yuchoti michah Abinü dhengyehre. Abi nyümrü tüchürosoh.

⁸Yucho atümungnü Ihsa Tsingrang seing; nührünü secho yuchisohng.

⁹Abinü Ihsa akang yohpüjücho ko Ihsa mükhülusohcho.

¹⁰Nühnü ihrü thsatsüko, O Tsingrang; michangnü taripi müchehdhengcho kyo, Nühnü ihrü thsatsodhengko.

¹¹Nühnü zeng la ihrü dhrümrangsohcho, ko ihrü rung chah bha amüling dhikehjücho.

¹²Arorüh khyang ihrü michah dhrümchisohcho; ihrünü michang ko kihmülüm khu wücho, ta ade Nühnü ihrü akyahshang lih la noroko.

¹³Ihnü trüp mübü Nü kuh yang hironung; Ihnü Nü khyang anyengchocho mübünung.

¹⁴Ih thsangthsi la lide jünung nyengchocho; Ihnü Nü khyang jünung.

¹⁵Bholu chah trüpnung san Ihnü mübünung; Ihnü misüpung ko miza kangmübü jünung, ko mikhu tsü ning chii küdunung.

¹⁶Nührü Tsingrangba drürü atümung rung ko nyieng, ko Abinü I te tu nguchicho yonung.

¹⁷Ihnü arüku nengdang Abi te züdecho; Ihnü khi khu Abi secho.

¹⁸Ihnü I münyi rangpülanglü, ABÜDONGBAnü I te münyiba thsako.

¹⁹Ta Tsingrangbanü I te yuje nyiko; I dangkhidangnang Abinü yuchiko.

²⁰Ihnü Tsingrangba sere, tunüo Abinü I dangkhidangnang müthsongli, mahkhang Abi amüthreba amüi mükhyümüi.