Read Sangtam Naga NENGSEKHI 71 Bible Online

NENGSEKHI 71 - Sangtam Naga bible

NENGSEKHI 71

¹ABÜDONGBA, Nü chah Ih tsikehre; Ih khodesü ashah tükhyüsoh!

²Nüh Amüsaba la Ih troung ko khümchoung. I yu nyijüng, ko Ih khümchoung!

³Nüh I tsikehchah lung thsaang, ko Ih tsungtinung akhümkhüm roshengvi; tunüo Nüh I tsikehsing ko roshengvi.

⁴O Tsingrang, amütsarü, yuje müchorü, ko akhürahrü kheh lanü Ih khümchoung.

⁵Amichahba ABÜDONGBA, Nü chah Ihnü longdire; I za denü Ihnü Nü chah yudsire.

⁶Nü chah I kang ayung ngakehre; I suro nyümong tinü Nühnü Ih tsungtiko. Ihnü lede Nüh senung.

⁷Bürü nengdang I kang adüzü thsa roko, ta Nüh I tsikehsing akhümkhüm.

⁸Nyümong ayung Ihnü Nüh sere ko Nü ahechi sobhore.

⁹Ashilang Nühnü Ih tüthrüchahchüpeh; Re müzeh rode Nühnü Ih layü tüpehjü.

¹⁰I rorütinü I kang khyünyüre; arühnü chota Ih nyüm rah külüpre.

¹¹Arühnü yore, “Tsingrangbanü abi thrüchahchüpehko; Ihsanü abi khanglang wonung ko abi rangnung; abi rerechorü süsü müle.”

¹²O Tsingrang, shura wü tüli; I Tsingrang, Ih tronung dhsüthsang!

¹³I berüti tsü kohjüng ko changjüng. I lerohpehjünung müküprüti tsü ashah khyüsohng ko wahsohng.

¹⁴Ihnü lede Nü chah I alongdi yohpünung; Ihnü alaa alaa Nüh senung.

¹⁵Ihnü Nü tsacho nengdang yonung; Nü akangcheh Ihnü nyichehnung mükoh nye, Ihnü nyümong ayung chonung.

¹⁶Ihnü Nü zii senung, Akohba Tsingrang; Ihnü Nü Amüsaba, nengdang du sobhonung.

¹⁷I zadenü Nühnü I te doko, ko Ihnü adesü Nü anyemüyang nguchi shulüm yore.

¹⁸Adelü Ih shiko ko kutpoh chüroko, Ih tüpehjü, O Tsingrang! Ihnü aronung shang te Nü suhre ko zii sobhode Nüh I te lieng.

¹⁹O Tsingrang, Nü Amüsabanü ning chihko. Nühnü nguchi arangcheh nguchiko; Nüh kyo süsü müle.

²⁰Nühnü Ih yang thsangthsi ko chongcha müthehko, ta Nühnü I khyang suhre jünung; Nühnü thali Ih khamüsunung.

²¹Nühnü Ih akhudi tenü adiu kangsohnung; Nühnü thali Ih tbachisohnung.

²²Ihnü yuje tbenglah tii Nüh senung; Ihnü Nü yuje nengdang senung, I Tsingrang. I tbenglah la Ihnü Nü te mübü khi thsanung, Israelrü Amüsaba.

²³Nü nengdang khi thsade, Ihnü akünyangnü züdenung; I kang üpümshünü khi thsanung, tunüo Nühnü Ih khümchoko.

²⁴Ihnü nyümong ayung Nü Amüsaba nengdang chonung, tunüo Ih thsakehjünung müküprüti Nühnü ashah khyüsohko ko wahsohko.