Read Sangtam Naga NENGSEKHI 73 Bible Online

NENGSEKHI 73 - Sangtam Naga bible

NENGSEKHI 73

¹Tsingrangbanü Israelrü te yuje tsare, lasih müsa lirü te Abinü tsare.

²Ta I longlang changmüphohko; I yudsi changmüphohko,

³tunüo amüthsehrü ko amütsarü müwajücho ngude, Ihnü nahmohcho.

⁴Arüh chongcha müle; arüh re azeh ko shulutsa lile.

⁵Aparü kyo arüh müchongcha; aparü kyo thsangthsi mümüdoh.

⁶Hütsünü amüthseh tsü lah roh-i lahre ko shühkhatoh tsü fükhüm roh-i khyüre;

⁷Arüh nahtse asunü bümtire, arüh lasih lanü amünyi pohchehre.

⁸Arühnü bürü münyodhengre ko mütsa chore; arüh akükhing ko bürü nyüpmüsehnung lümchungre.

⁹Arühnü ning Tsingrang nyüm chore ko alih la nyitsarü khyang hongzi yuzeng jüre.

¹⁰Hütsü khu müyurünü mii arüh yang würe ko bholo liba kih tsü yongre.

¹¹Arühnü yore, “Tsingrangbanü mümüdhenung; Amichahbanü mürangchehnung.”

¹²Amütsarü tsü hütsüta lile. Arüh thangchi lile ko lede alaa du ngure.

¹³Khang, amünyi müshitpahpü Ipu müsacheh liba tsü tu mah ang?

¹⁴O Tsingrang, nyümong ayung Nühnü Ih chongchasohko; nyangnyü mükhu Nühnü Ih khingchiko.

¹⁵Ihnü hütsüri chopü likhang, Ih Nü müyurü khüdu kyo münguchi.

¹⁶Ihnü hiba bhamüling hi lümdhengnung müküpko,

¹⁷ta Nü Amübükuh yang müwüdelü, I nengdang hütsü khura athsah licho. Hütsüde amütsarü chah tu tikehnung Ihnü nyichehcho.

¹⁸Nühnü arüh ashüsheh la yohpünung ko changsohnung arüh khülusohre!

¹⁹Arüh dhrongyengnü changpehre; arüh adrünung achangba la züdure.

²⁰Arüh anyangnyü nbüchopehba melang kyole; Nüh shemüsude, O ABÜDONGBA, arüh changpehre.

²¹Khode I lümlong khacho, ko I lasih thsakehcho;

²²Ih kanglungrü kyo mongdongcho; Ihnü Nüh münyichehcho.

²³Ta lede Ih Nü shündhün licho, ko Nühnü I kheh marehcho.

²⁴Nü athülabanü Ih nüre ko achangka la Nühnü Ih dhichi khyüchonung.

²⁵Nü chah khu ninglang I nengdang sü liro? Nüh likhang, limih la Ihnü sü thsütahcho?

²⁶I thoh ko Ifü shinung kohle, ta Tsingrangba I tase; I thsütah apüm Abi du.

²⁷Nüh thrüchahchüpehrülü yuje changnung; Nü te yuje müchorü Nühnü changjünung.

²⁸Ta Ihlü, Tsingrangba shündhün linung, Amichahba ABÜDONGBA atsungtiba ngunung ko Abinü nguchicho apüm sobhonung tsü khütoh-i anyemüyangnung!