Read Sangtam Naga NENGSEKHI 74 Bible Online

NENGSEKHI 74 - Sangtam Naga bible

NENGSEKHI 74

¹O Tsingrang, tuepü Nühnü ihrü hita pehjücho? Nühnü Nüpu nyitsarü te lede nengdang zichüronung do?

²Nühnü papade Nüpu nengdang throchehcho, Nüpu yucho kangnung ayurü suro lanü nüchehbati lümchehng. Nüh khüdupi liba, Zion Zong lümchehng.

³Atrümnahcho hiri michah tsehng; ihrü rorünü Amübükuh la lüpcho thsangnyangjüko.

⁴Nü Amübükuh la Nü rorünü akoh ngu züdeko; arühnü akoh ngucho amüdhethsa arüh nisan hütsüla thungko.

⁵Sing rerünü arüh pühnü sing retsucho kyo arüh lile.

⁶Singnü külüpcho apüm arühnü püh ko ikengsing kengnahjüko.

⁷Arühnü Nü Amüsa kuh tphünah tahpehjücho; Nü mübüji chah tsü arühnü münyijüko.

⁸Arühnü ihrü khüdupinü münohnah; arühnü Amüsa kuh müdüm apüm tahpehjücho.

⁹Ihrünü Amüsaba amüdhethsa tusü müngure; azikehrü süsü münying, ko hi khüdoi nyahli linungnang sünüsü mümüdhe.

¹⁰O Tsingrang, ihrü rorünü khüdoi nyahli Nüh münyüjünung? Arüh khyang lede Nü neng müthsamünyüsohnung mah-o?

¹¹Tuepü Nühnü ihrü tronung thsonglicho? Tuepü Nü hongkoh müthsühpü pümro?

¹²Ta, O Tsingrang, adikeh lanü Nüh ihrü Yangthsaba; Nühnü adrongpi ihrü khümchoko.

¹³Nüh akohba tasenü kihdi changshojücho ko kih kangdi thah maprüpjücho;

¹⁴Nühnü Leviathan thah nyehrüpjücho ko abi fü rangmü kanglungrü khyang tüpcho.

¹⁵Nühnü kihnatung ko yongna pohsohre; Nühnü yongkhi adidi kungchehsohre.

¹⁶Nühnü anyümong ko aromang külüpcho; Nühnü nyü chonu arüh pümji la chürosohcho;

¹⁷Nühnü alimih kihsahjücho; Nühnü tsingkang müyü külüpcho.

¹⁸Ta O Tsingrang, lümchehng, Nü rorünü Nüh münyüjüre, ko müyudsirünü Nüh müthsamünyüre.

¹⁹Atrorü müliba nyitsarü arüh rorüh khehla tüpehjü; dhsümthseba Nü nyitsarü tünbüchü!

²⁰Nühnü ihrü te külüpba azengtacho lümchehng. Limih amarürah jongnah apümlang shühkhatoh lile.

²¹Chüpseh lirü ashah tükhyüsoh; ailümrü ko achongcharünü Nüh sesohng.

²²Shemüsung Tsingrang, ko Nüpu alanglang nengdang choung! Nyümong ayung Tsingrangba mümüdherünü nüh münyüjürepü lümchehng.

²³Nü rorünü zichüro züdecho, ko Nü münyehrünü mütozah khongcho tünbüchü.