Read Sangtam Naga NENGSEKHI 77 Bible Online

NENGSEKHI 77 - Sangtam Naga bible

NENGSEKHI 77

¹Ihnü Tsingrangba te zi züdecho; Ihnü zi züdecho, ko Abinü yuva yuchicho.

²Thsangthsi shikhe la Ihnü ABÜDONGBA te kihchicho; müyüp Ihnü I kheh dhimüsu dangkhidangnangcho, ta atbachi müngucho.

³Ihnü Tsingrangba nengdang lümdhengde, Ih rühchicho; Ihnü lümdhengde, I suzahpehcho.

⁴Abinü müyüp Ih lümkangsohre; Ih khura lümtpahnahchonü yu müchochehre.

⁵Atsicho nyümongti nengdang Ihnü lümdhengre ko atsicho kangti lümchehre.

⁶Ihnü aromang soh lümdhengre, Ihnü lümdhengde Ipu te hita tsingdhengre:

⁷“ABÜDONGBAnü lede Ihsa pehjünung mah-o? Adelü Abinü Ihsa te thali mükünyangnung mah-o?

⁸Abinü Ihsa müikacho mah-o? Abi anyengchocho thümcho mah-o?

⁹Tsingrangbanü yanglilümnung nbüchücho mah-o? Abi achomang tsü zichürobanü mülicho mah-o?”

¹⁰Hütsüde Ihnü yocho, “Tsingrangba adelü tase mülepü yoba tsünü Ih alaa wahre.”

¹¹ABÜDONGBA, Nü nguchi amülah Ihnü lümchehnung; Nühnü atsicho la anyemüyangnung nguchicho Ihnü lümkehnung.

¹²Nühnü nguchicho apüm shulüm Ihnü lümnung; Nü akohba nguchi apüm nengdang Ihnü lümdhengnung.

¹³O Tsingrang, Nühnü nguchicho apüm Amüsa. Nü toh-i tsingrang apa müle.

¹⁴Nüh thsayahiya nguchiba Tsingrang; yanglihti yola Nühnü Nü tase ngusohcho.

¹⁵Nü ziinü Nühnü Jakob ko Josefrü trah, Nü müyurü khümchoko.

¹⁶O Tsingrang, khode kihnü Nüh ngucho, arühnü drücho, ko kihdi asohnü dhridhricho.

¹⁷Nyükhinü tsing rosohcho; ning chahnü ningkicho, ko mükangmüla ningmülacho.

¹⁸Nüh ningki khong rachicho, ko ningmüla limih vicho; alihnü dhridhri shühchicho.

¹⁹Nühnü kiloh khu tsehcho; Nühnü kihyü asoh kehcho, ta Nü jingdrang müngucho.

²⁰Mosa ko Aron nyühnü müyurü nücho kyo, Nühnü Nü nyitsarü nücho.