Read Sangtam Naga NENGSEKHI 78 Bible Online

NENGSEKHI 78 - Sangtam Naga bible

NENGSEKHI 78

¹O nyitsarüti, I adoba nyieng, ko Ihnü yocho la müsi jüng.

²Ihnü choyoh yu bichinung, ko papade I arang lümlong yonung.

³Ihsanü yuchicho ko müdhecho kohro, Ihsa tpurünü Ihsa te yocho nguchi.

⁴Ihsanü Ihsa tsuzarü tenü hiri rang müyohpünung; ta ABÜDONGBA zii ko Abi nguchiti ko Abinü nguchicho anyemüyangnungti shulüm Ihsanü aronung shang te yonung.

⁵Abinü Israelrü khyang yuzeng jücho ko Jakob trah khyang yuzengti jücho. Aronung shang la arühnü nyichonung ko arüh tsurüti te yomüchinung shulüm,

⁶Abi yuzeng arüh tsuzarü te dosohnung Abinü ihrü jümürü te thülacho.

⁷Hütsüde arühnüsü Tsingrangba chah yudsinung ko Abinü tu nguchicho hütsü münbüchünung, ta lede Abi yuzeng nyinung.

⁸Arüh jümürüti ahongzi ko yocho münyirü, Tsingrangba chah müyudsirü ko Abi te mülonglangchehrü mükyonung.

⁹Rothsa nyümong Efraimrü arüh tbüdeng, ko singthsalu bipü shehcho.

¹⁰Tsingrangba te azengtacho arühnü müyohpücho; ko Abi yuzeng mübichicho.

¹¹Arühnü ngu Abinü nguchiba, thsayahiya arühnü nbüchücho.

¹²Arüh jümürütinü ngu Ijip la, Zoan ngah la Tsingrangbanü thsayahiya nguchicho.

¹³Abinü kihdi changshosohpü hütsü khu arüh nükhucho; Abinü kih tsü züdi kyo yasohcho.

¹⁴Abinü arüh anyümong nyükhinü ko aromang atsingse michangnü nücho.

¹⁵Abinü lipilih la lung maprüp arüh khyang kih tihcho.

¹⁶Abinü lung lanü kih pohchehsoh yongkhi kang pohsohcho.

¹⁷Ta arühnü mütozah Tsingrangba nyüm amünyi shitpahcho, ko lipilih la arühnü Amichahba nyüm yacho.

¹⁸Arühnü ahsanü Tsingrangba thsatso arüh tsunyücho tsuyongnung chingcho.

¹⁹Arühnü Tsingrangba nyüm yocho, “Lipilih la Tsingrangbanü tsuyongnung jüchehnung do?

²⁰Ho, Abinü lung la xüpcho, ko hütsü lanü kih pohchehcho; ta Abinü Ihsa khyang hümthse ko shuh mii jüchehnung do?”

²¹Hütsünü ABÜDONGBAnü hi yuchide zichürocho; Abinü michangnü arüh becho, ko arüh nyüm Abi zii alaa chürocho,

²²tunüo arühnü Abi chah müyudsi ko Abinü arüh khümchonungepü arühnü mülongdicho.

²³Ta Abinü ning mihlangrü te chotacho ko kukhang khangthrunung yuzeng jücho;

²⁴Abinü arüh khyang atsunung manna jücho, ko arüh khyang ninglangrü tsuyongnung jücho.

²⁵Hütsüta arühnü ninglangrü tsuyongnung tsucho, ko Tsingrangbanü arühnü chingcho apüm jücho.

²⁶Abinü nyüchüro nyübongsü füsohcho, ko Abi ziinü kihjing lahpi nyübongsü thsümüsucho;

²⁷ko abinü kihbekhüm la lihpi doi arüh khyang uza jürosohcho;

²⁸arüh shükuh mükang uzati tsü longcho.

²⁹Hütsüde nyitsarünü tsucho ko longnyüpcho; Tsingrangbanü arühnü chingcho jücho.

³⁰Ta arüh long münyüp-pü tsu du tsuchonü,

³¹Tsingrangbanü arüh te zichüro Israel la re zehrüti, dhrezarü atsati mapsehcho.

³²Hütsütanye amünyi shitpahducho; thsayahiya nguh nye arühnü Abi chah müyudsicho.

³³Hütsünü arüh nyümongti asah roh-i ko arüh akang dhrongyengnü changkajücho.

³⁴Khode Abinü arüh yola khürü mapsehnang, anyingchoti tsünü Abi yang ximülacho; arühnü lasih thsamüla Abi te khahkhah dangkhidangnangcho.

³⁵Tsingrangba tsü arüh tsungtibong ko arüh tronung Akohbong rochoepü arühnü lümchehcho.

³⁶Ta arüh yu tsü apüm arahkheh du; arühnü chocho tusü yuje müle.

³⁷Arühnü Abi te yocho münyicho; arühnü Abi te azengtacho la Yuje müchocho.

³⁸Ta Tsingrangbanü anyitsarü te yanglilümcho. Abinü arüh mülang pehjücho ko arüh müchangsohcho. Adrongpi Abinü zichürocho ko Abi rihlong ranglicho.

³⁹Arüh tsü asüba shutsa du, fo tsipehba nyübong roh-i duepü Abinü lümchehcho.

⁴⁰Arühnü lipilih la khüdopi Abi nyüm yacho; khüdopi arühnü Abi wahsohcho!

⁴¹Thali thali arühnü Tsingrangba thsatsücho, ko Israel Amüsa Tsingrang zii chürosohcho.

⁴²Abinü arüh arorüh kheh lanü khümchoba nyümong, Ijip lih la Zoan ngah la,

⁴³amüdhethsa ko thsayahiya nguchicho. Abi zii amülah arühnü nbüchücho.

⁴⁴Abinü yongkhi ashüh kangsohcho, ko Ijiprü ayongnung kih mülisohcho.

⁴⁵Abinü bhifü müthehcho, hütsünü arüh khingchicho, ko kheng mütheh arüh lih thsangnyangjücho.

⁴⁶Arüh tsahma tsunung ko arüh luh thsangnyangsohnung Abinü khengqu müthehcho.

⁴⁷Abinü arüh shükusiluh thsangnyangsohnung shurü ko arüh ngurüsih thsangnyangsohnung müdhrang müthehcho.

⁴⁸Abinü arüh misü shurünü ko arüh santi tsingchinü süsohcho.

⁴⁹Abinü asüba riwürüti te Abi zii ko rihlong chürosoh arüh chah, chongcha amülah rosohcho.

⁵⁰Abinü Abi zii mümüshüli mahkhang arüh akang müditpangpü, arümranü süsohcho.

⁵¹Abinü Ijiprü kukhi mükhu la aukhuba süsohcho.

⁵²Hütsüpü Abinü san-nyahrünü kyo Abi nyitsarü nüchehcho ko lipilih khu nücho.

⁵³Abinü arüh khümcho nücho, ko arüh tu müdrücho; ta arüh rorüh michahlü kihdinü lohticho.

⁵⁴Abinü apunü kohchehcho Abi Amüsa azong lih, yang arüh norocho.

⁵⁵Abinü Abi nyitsarüti chii rode hütsüla lirüti iipehcho; Abinü arüh lih Israel hung khyang changnahjücho ko arüh kuh Abi nyitsarü khyang jücho.

⁵⁶Ta arühnü Akohba Tsingrangba nyüm yacho, ko Abi thsatsücho.

⁵⁷Arühnü Abi yuzengti mübichicho, ta arüh tpurü kyo hongzinü tbüdeng akureng kyo yocho münyicho.

⁵⁸Arüh amünyi mübüba müdümti ko arüh kyothri khu Abi zichürosohcho.

⁵⁹Tsingrangbanü hütsüri ngude arüh te zichüro arüh khüdupinü pehcho.

⁶⁰Abinü Shilo la Abi shükuh khüila apu Ihsa yola licho hütsü thrüchahchüpehcho.

⁶¹Abinü Ihsa rorüh khyang azengtacho, Abi zii ko ahechi kengchosohcho.

⁶²Abinü anyitsarü te zichürocho ko arüh rorüh khyang arüh mapsehsohcho.

⁶³Dhrezarüti rothsa la kyüsehkhangcho, ko lazarüti akhyürü süsü mülicho.

⁶⁴Bebürüti nohshengnü sücho, ko arüh chomirüti khyang me mütrasohcho.

⁶⁵Achangka la yüpjocho lanü surorü kyo ABÜDONGBA suro; Abi yongkhanü nümüsucho athrungrü khüdu kyocho.

⁶⁶Abinü lede nengdang arorühti ashah khyüsoh khanglang shehlisohcho.

⁶⁷Ta Abinü Josef trah mükhyüchocho; Abinü Efraim hung müthrocho.

⁶⁸Ta Abinü müiba Zion Khang, ko Juda hung throchehcho.

⁶⁹Hütsüla ninglang Abi kuh kyo Abi amübükuh thsacho; Abinü lede nengdang alih abükyü kyo, drengdreng thsacho.

⁷⁰Abinü Abi dikehrü David; San nyah liba jungchahnü throcheh,

⁷¹Tsingrangba nyitsarü san-nyahrü, thsanung Israel Yangthsaba kangsohcho.

⁷²Davidnü khakhuchüjo arüh xükümcho, ko lümlong zeh arüh nücho.