Read Sangtam Naga NENGSEKHI 85 Bible Online

NENGSEKHI 85 - Sangtam Naga bible

NENGSEKHI 85

¹ABÜDONGBA, Nü limih te Nühnü yanglilüm roko; Nühnü Israel thali zehzangsohko.

²Nü müyurü münyi Nühnü pehjüko ko arüh thsamehcho apüm mülang pehjüko.

³Arüh te zichürocho zahko ko Nü rihlong khyümüiko.

⁴O ihrü Kangchehjüba Tsingrang, ihrü külüpchilijüng, ko ihrü te wahcho zahng.

⁵Nühnü ihrü te akang ayung wahnung do? Nü zichürocho khodesü müzahnung do?

⁶Ihrü asi kangchijüng, ko ihrü Nü müyurünü Nüh senung.

⁷O ABÜDONGBA, ihrü te Nü amüthreba amüi ngusohng, ko ihrü khyang Nü akangcheh jüng.

⁸ABÜDONGBA Tsingrangnü yocho Ihnü nyire; Ihsanü Ihsa amüsithsa lang la müthalikhang, Abinü Ihsa Apu müyurü te yangtsa nyengchore.

⁹Yuje sürünü Abi drüro Abi akangcheh arüh shündhün lile, ko Ihsa lih la Abi akhümcho linung.

¹⁰Amüi ko yuje choba shirütanung; amüsaba ko yangtsa khyahritanung.

¹¹Yocho nyibanü alih lanü ning chihnung, ko ninglangnü Amüsabanü alih chii jüronung.

¹²ABÜDONGBAnü Ihsa zehzangsohnung, ko Ihsa lihnü thangchi chürosohnung.

¹³ABÜDONGBA bekhu Amüsaba wünung, ko Abi khyang lang rungnümjüng.