Read Sangtam Naga NENGSEKHI 91 Bible Online

NENGSEKHI 91 - Sangtam Naga bible

NENGSEKHI 91

¹Atsikehnung sünü ABÜDONGBA yangchiro, Amichahba atsungtiba pohki sü liro,

²arühnü Abi te hita yochehle, “Nüh I tsungtirü ko I khümrü, Nüh I Tsingrang; Nü chah Ihnü longlangre.”

³Rang liba dhsürü ko asüba wara apüm lanü Abinü nüh khümchonung.

⁴Abi qonü nüh phatinung; Abi axükümba la nüh khümcho linung; Abi yujenü nüh tsungtinung ko khümnung.

⁵Aromang tu adhsürü mahkhang anyümong dhrongyeng abeba,

⁶mahkhang amala asüba mahkhang amünyinü anyümong kyüsehba asüba nühnü tu müdrünung.

⁷Nü shündhün hajar khülunung kohle, nü mükang hajar dhüre, ta nühlü müdhsakehnung.

⁸Amütsarüti khüta khingchiro nühnü ngunung.

⁹Nühnü ABÜDONGBA tsü nü khümrü, ko Amichahba nü tsungtirü kangsohko,

¹⁰hütsünü tu asübanü nüh müchinung, shühkhatohbanü nü kuh amünyethsa müronung.

¹¹Nüh khüdederü wonang nü tsungtinung Tsingrangbanü Abi riwürütinü dhengyehnung yohpünung.

¹²Lung chah nü jing mümüthisohnung arüh khehnü nüh wüpnung.

¹³Nühnü kihkangdi ko mürü adrünung kihkangdi ko müyüh mürü dhrümsehnung.

¹⁴Tsingrangbanü yore, “Ihnü I müirü khümchonung ko Ih ABÜDONGBA epü sünü müdhero arüh tsungtinung.

¹⁵Arühnü Ih dside, Ihnü arüh te lalingnung; arüh thsamütsa la lide, Ih arüh te linung. Ihnü arüh iichonung ko dhichinung.

¹⁶Ihnü arüh khyang kutsüp jünung; Ihnü arüh khümchonung.”