Read Sangtam Naga CHOYOH 1 Bible Online

CHOYOH 1 - Sangtam Naga bible

CHOYOH 1

¹Israel Yangthsaba, David tsurü Solomon-nü choyohcho yu.

²Nyitsarünü lümlong, akülüpcho ko yu asoh nyichehnung.

³Lümlong pisa khyüchonung, müsa yuje cho ko phülari linung;

⁴Lüm müpisarü pisasohnung ko kunuti anyichehba kangsohnung.

⁵Asithsarünü yuchi lümlong zikehnung ko anyicheh nyitsarü alaa xangchehnung,

⁶asithsa nyitsarünü tsingdhengcho yu ko rang licho choyoh yu nyichehnung nengdang lile.

⁷ABÜDONGBA jengreng drüba tsü lümlong adikeh; adohrünü lümlong ko athülacho mükhyüchore.

⁸Itso, nüu nü thülacho nyieng ko nütpanü docho tüpehjü;

⁹tunüo hiri tsü nü thah chah kuthri ko nü hong la atanglah lile.

¹⁰Itso, münyirünü münyehcho la tüiwü.

¹¹Arühnü yore, “Rung Ihsanü jüm yapü khürü müpsehnung, achomükeh nyitsarü khürü chah kheh thahnung;

¹²Asü lih ko shukuh la dhrümyohcho kyo Ihsanü arüh akangnü münyünung;

¹³Kuthsi apüm ngunung ko arohchocho kohronü Ihsa kuh jengnung,

¹⁴ihrü yola zehng ko Ihsa trümtanung.”

¹⁵Itso, hitari nyitsarü yola tümükhong, arüh tenü za lieng;

¹⁶tunüo arühnü amütsa nguchi yang shangre ko shühkhatohnung dhsüthsare.

¹⁷Arühnü adengtingla uza abükyünü ngu zeng thsajüre;

¹⁸ta hütsü abürü nengdang zeng thsare ko abürü akang jümre.

¹⁹Arahkhehnü jingchonung iichirü akang changkare ko hütsü jingchorü akang khyüre.

²⁰Lümlongnü yanglong la ko shithsa chah,

²¹Yangdi tbükhüm ko nyitsarü shibülung chah züdere.

²²O amüsithsarü, khüdoi nyahli müsithsanung? Khüdoi nyahli nührünü lümlong müthsamünyünung. Nührü khodesü münyichonung do?

²³Ihnü yübücho nyieng; Ihnü nührü te I lümlong ngusohnung ko I yu müdhesohnung.

²⁴Tunüo Ihnü nührü dsicho ko nührünü münyi, I kheh müyungchücho ko sünüsü mükhichi.

²⁵I thsingyucho apüm nührünü mükhyü ko Ihnü müchongchijücho nührünü münyi.

²⁶Nührü thsamütsa dhsürü mütohde Ihnü nührü müthsamünyünung.

²⁷Nührü chah tsingxinyübong kyo amülah adrünung chongcha rotonü chihde, Ihnü nührü müthsamünyünung.

²⁸Hütsüde nührünü I te züdenung, ta Ihnü mülalingnung; nührünü Ih yangchinung ta Ih müngunung.

²⁹Tunüo nührünü lümlong thrünyicho ko ABÜDONGBA drüba müthrocheh,

³⁰I thsingyucho mükhyü ko I khatacho mükhimüngucho.

³¹Hütsüeko nührünü nguchicho aleng ngunung ko nührü nguchinü nührü hatsakümnung.

³²Amüsithsarü arüh ximüla tsicho ngang sünung ko adohrü longlangrachonü changnung.

³³Ta I yu nyirü aringnung müle. Abi adrünung mülipü khümcho linung.