Read Sangtam Naga CHOYOH 10 Bible Online

CHOYOH 10 - Sangtam Naga bible

CHOYOH 10

¹Hiri Solomon choyoh yu: Lümlong liba azarünü au künyangsohre; ta amüsithsa azarünü atpa lasih mütrungsohre.

²Yuje mücho hiroba kuthsinü tu müjingchore, ta yuje chochonü akang khümchore.

³ABÜDONGBAnü nyitsarü atsa yangxo müpehjüre, ta amütsarü müdsimüku pehjüre.

⁴Dserechonü iilümsohre, ta müküpchonü alirü kangre.

⁵Müyüde sünü kyübülungro abi asithsa, ta maxade sünü yüpjoro ashah khyüre.

⁶Nyitsarü atsarü amüwa ngunung. Amütsarü yu la shühthrehba rangpüre.

⁷Nyitsarü atsa tsü amüwa khüdu kyo lümkehre, ta amütsarü zah nbüchüre.

⁸Apisarünü athsingyucho nyire, ta amükhyüba du chorü achangba mütohnung.

⁹Yuje chorü aringnung müle, ta yuje müchorü xohnung.

¹⁰Yuje mükhohchehba tsünü alongmüzi chürosohre; ta misha müchongchichonü yangtsa chürosohre.

¹¹Nyitsarü atsa yu tsü akang yongna, ta amütsarü yu la shühthrehba rangpüre.

¹²Thrünyitachonü yubejarong chürosohre, ta amüinü amünyi nitire.

¹³Athsehthsarünü lümlong li chore, ta adohrü akhingchi ngunung kangre.

¹⁴Apisarünü amüdhe apüm ngure, ta amüpisarünü chode yubejarong jingte jole.

¹⁵Kuthsinü alirü tsungtire; müdsichonü ailümrü changjüre.

¹⁶Nguchi atsa jiyü tsü akang, ta amünyinü alaa du münyisohre.

¹⁷Sürünü müchongchijüde nyirü arüh akang linung, ta sürünü münyirü arüh dhsürü la lile.

¹⁸Sünü thrünyitaba rangpüro abi arahkheh chorü. Sünü tsupohyupohro abi amüpisa.

¹⁹Nühnü alaa chode alaa du shitpahre, lümlong likhang nühnü sahmüthsanung.

²⁰Nyitsarü atsa yu tsü amüluchehcho taripi kyole; amütsarü khiyu tsü amii müle.

²¹Nyitsarü atsa yunü adrong jingchosohre, ta müsithsachonü abürü mapsehre.

²²ABÜDONGBA amüwanü nüh lisohre. Müküp nguchichonü aliu mükangcheh.

²³Amütsa nguchinung la künyangba tsü adohrü. Athsehthsarünü lümlong te künyangre.

²⁴Amüsarünü arüh khyünyücho ngure, ta amütsarünü arühnü khüsha drüba mütohre.

²⁵Tsingxinyübong ro amütsarü fo tsire, ta yuje chorü khümchore.

²⁶Adsererü khyang tusü nü nengdang tünguchisoh; abi aha nengdang acikih ko nü nah nengdang mikhu kyole.

²⁷ABÜDONGBA drüng ko nüh kutsüp linung, ta amütsarü amüsükyang süre.

²⁸Nyitsarü atsa alongdinü akünyang yang nüre, ta amütsarü dhengkehchah tu müle.

²⁹ABÜDONGBAnü yuje chorü tsungtire, ta amütsarü changsohre.

³⁰Amüsarü lede tsikehchah lile, ta amütsarü alih la mülinung.

³¹Amüsarü be lanü lümlong yu chürore, ta amütsa choba müle tsü tangtinung.

³²Amüsarünü amüi yu chonung müdhere, ta amütsarü be lanü lerohpehba yu du chore.