Read Sangtam Naga CHOYOH 13 Bible Online

CHOYOH 13 - Sangtam Naga bible

CHOYOH 13

¹Lümzeh azarünü au thülacho nyire, ta hongzirünü thsingyucho münyire.

²Nyitsarü atsanü chocho yu la amüwa ngure, ta kihyochürünü shühkhatohnung du lümre.

³Abe rahsehrü apu akang khümchore. Abe mürahserü dhsürü mütohre.

⁴Adsererünü tu khüdoi mükhyah nye müngure, müküp nguchirünü akhyünyücho apüm ngure.

⁵Yuje chorünü arahkheh thrünyire, ta amüsithsarünü ashahmükeh ko mih müxüpba nguchi nguchire.

⁶Amüsabanü achomükehrü khümre; ta amünyinü amütsarü khülusohre.

⁷Khürünü tusü mülipü alirü roh-i ngusohre; ta khürünü khütang lipü ailümrü roh-i ngusohre.

⁸Alirünü akuthsinü apu akang lihchehre; ta ailümrü alihchehnung tusü müle.

⁹Amüsarü tsü visajüba atsingse kyo lile; ta amütsarü tsü meh tsiba dsi kyole.

¹⁰Hongzichonü athsangthsi du chürore; ta lümlong lirünü aparü thsingyucho nyire.

¹¹Yuje müchonü ngucho kuthsi zah changre; ta müküpnü kyübülungcho kuthsi jare.

¹²Alongdi mütikehde müsi mütrungre, ta akhyünyücho tikehde akünyangnü jengre.

¹³Athsingyucho münyichonü athsangthsi du hirore; ta hütsü nyikhang nüh tsa linung.

¹⁴Lümlong lirünü doba tsü akang kihna, nü kang dhsürü la lide hütsünü nüh khümchonung.

¹⁵Athsehthsarünü jengreng ngure, ta long mülangchehrü tsü achangba lang la lile.

¹⁶Asithsarünü lümdhengpü du nguchire, ta adohrünü arüh amüsithsa müdhesohre.

¹⁷Amütsa yusi hirünü athsangthsi chürosohre, ta yuje chorünü yangtsa hirojüre.

¹⁸Athülacho münyirünü ailüm ko ashah dunü mütohre, ta sünü müchongchicho nyiro abi khyang jengreng jüre.

¹⁹Akhyünyücho ngunung tsü khüta atsa; ta adohrünü amünyi tenü müzanyüre.

²⁰Amüdherü te shangrü thsacho amüdherü kangre, adohrü te shangrü thsacho nüh thsangnyangnung.

²¹Münyirü khanglang suro mütsanü apümlang iire, ta Amüsarü yahlih-hilih lisohnung.

²²Nyitsarü atsanü shümtsurü khyang kuthsi pehjüre, ta yuje müchorü kuthsi tsü Amüsarü khehla züdure.

²³Bhidong lanü ailümrü khyang pungrosohre, ta yuje müchorünü luh tsü müthsasohre.

²⁴Nü tsurü müyübükhang nühnü abi mümüi. Abi müikhang nühnü abi mülichijünung.

²⁵Amüsarü thangchi lire, ta amütsarü lede yangxo lire.