Read Sangtam Naga CHOYOH 14 Bible Online

CHOYOH 14 - Sangtam Naga bible

CHOYOH 14

¹Apisa khingkurü lümlongnü kukhi külüpre, ta amüpisa khu hütsü thsangnyangre.

²Yuje choba tsü ABÜDONGBA jengreng drüre, ta yuje müchoba tsü ABÜDONGBA mükhimüngure.

³Amüsithsarü müthsehcho tsü yu alaa chore, ta lümlong lirü yunü apu khümchore.

⁴Luh xüba misüpung mülikhang shih adeng linung, ta hütsü likhang führünü jeng lire.

⁵Yuje chorü yuzi tsü yuje, ta yuje müchorü yuzi tsü arahkheh du.

⁶Müthsamünyürü khodesü lümlong mülire, ta asithsarünü zah nyichore.

⁷Amüpisarü te tümükhong, tunüo arüh chahnü nyichonung tu müle.

⁸Azahcheh nyitsarü tuepü lümlong liro? Tunüo abinü abi nguchi müdhele. Adohrü tuepü müpisaro? Tunüo abinü du müdherü roh-i abinü lümre.

⁹Adohrünü amünyi shitpah nye mülümxüre, ta nyüje nülü mülang pesohnyüre.

¹⁰Nü akünyang ko adhsa nüpu yo, sünüsü nü te müchangtacheh.

¹¹Amütsarü kuh khülu nye yuje chorü kuhlü yadunung.

¹²Nühnü yuje langepü lümba tsünü asülang nünung kohle.

¹³Münyüba la alongri rang zehnung kohle. Akünyang khanglang alongri lede lile.

¹⁴Amütsarü palu nguchi aleng thali ngunung. Nyitsarü atsa arüh nguchi aleng jiyünung.

¹⁵Adohrünü apüm yudsire; ta asithsarünü müzahnü mütrahre.

¹⁶Lümlong lirünü athsangthsi lanü tsiphu linung müzahre, ta adohrünü mümüzahpü dhsüthsa nguchire.

¹⁷Zii thsüthsahrünü mülümdhengpü nguchire; ta alümdhengrünü longlüm lire.

¹⁸Amümüdherünü arüh müsithsa aichi ngure, ta azahchehrü lümlong jiyü ngure.

¹⁹Amünyi nyitsarünü Amüsa nyitsarü jingte mükhukehnung ko arüh kihchinung.

²⁰Ailümrülü kurümrünü mii mümüire, ta alirülü shangrü adrong lire.

²¹Künyangnü linyükhang ailümrü müing; bürü müchümükehba tsü amünyi lile.

²²Atsa nguchiba tsü longlangba ko jengreng shehre; ta amünyi nguchiba tsü nüh thsamehre.

²³Nguching ko nühnü akang tsuyongnung ngunung, ta yu du thüp pümkhang nüh iilümnung.

²⁴Lümlong lirü khyang kuthsi müwajüre, ta adohrü tsü arüh müpisachonü müdhere.

²⁵Yuje choo yuzi thsade akang khümchore; ta yuje müchode aparü kihyochüre.

²⁶ABÜDONGBA jengreng drücho la longlangcheh amülah lile, ko abi tsurüti atsikehchah linung.

²⁷Nühnü asü phungkhunyürü do? ABÜDONGBA drücho tsü akang yongna lile.

²⁸Yangthsarü khüdu diba tsü amono sühdicho chah kehle; mono mülikhang abi tsü adeng.

²⁹Rangchokhang nüh lümlong lirü khüdue, ta thsüthsahkhang nüh amüpisa du ngusohre.

³⁰Lümlong tbachi lichonü afü tsasohre, ta nahmohba tsü arüh la mathsa kyole.

³¹Ailümrü khingchiba tsü akülüpbong Tsingrang müchümükehre; ta arüh müiba tsü Abi mübüre.

³²Amütsarünü arüh nguchinü arühbürü khülure, ta nyitsarü atsa arüh yuje chochonü arüh tsungtire.

³³Anyichehrü lümdhengcho müipi lümlong zehre, ta adohrünü lümlong tsü mümüdhe.

³⁴Amüsabanü limih khüdu dhikehchüre; ta amünyi tsü limih nengdang ashah.

³⁵Longlangchehba adirüti te yangthsarünü künyangre, ta tsa müdikehrü arühnü khingchire.