Read Sangtam Naga CHOYOH 17 Bible Online

CHOYOH 17 - Sangtam Naga bible

CHOYOH 17

¹Yubejarongnü jeng liba kuh khüdu la thsüti tsunung tenü longlümnü tsangkung tsunung atsau.

²Asithsa kulirünü tulamüyoh abüdongrü tsurü michah abüdongba kangre ko thsiking lanü nohlüm ngure.

³Hon ko taripi michang la tahdheng düzüre, ko nyitsarü lasih ABÜDONGBAnü düzüre.

⁴Amütsa nguchirünü amütsa khiyu nyire, ko yuje müchorünü arahkheh yu nyire.

⁵Sünü ailümrü müthsamünyüro abinü Akülüpbong müchümükehre; sünü bürü suro mütsacho ngu künyangro abi mükhingchipü mülinung.

⁶Ashialongrü kuthsi tsü shümtsurü, ko tsuzarü ahechi tsü au.

⁷Adirünü arahkheh müchore, ko amüpisarünü akhyüba yonung tu müle.

⁸Pohsa tsü ajüba nahtse te zii khüdu kyo lile; abi khüde wonang apümlang müware.

⁹Bürünü müisohnyükhang arühnü thsamehde arüh mülang pehjüng. Thsamehchonü shangrü zasohrepü lümkehng.

¹⁰Adohrü khyang thsihpi lahcho tenü athoh zehrü te khüdupi yübüchonü alaa nyichehre.

¹¹Amütsarü sürünü lede athsangthsi chürosohro, arüh yang alungkha yusi hirü kyo asüba rore.

¹²Amükhyüba lümchung hirü amüsithsarü shirünung tenü aza chahpü rachiba shühmü atpa shirücho atsau.

¹³Nühnü atsa mülih amütsa jükhang, nü kuh lanü amünyi khodesü mütsinung.

¹⁴Yubejarong adikeh tsü kih-dümticho rohphohcho kyole; alaa adiu mükangde dümtieng.

¹⁵Amütsarü langjüba ko Amüsarü mülangjüba anyüding tsü ABÜDONGBA jingte athrünyinung.

¹⁶Amüpisarünü thsi pehnü lümlong yangchinung müdhsüdah, tunüo abi athoh müzeh.

¹⁷Suro apüm la shangrünüsü müire, ko jünirü tsü suro mütsade dhengtanung nengdang lire.

¹⁸Athoh müzehrünü du bürü thsite sahjünung phungchore.

¹⁹Sünü amünyi müiro abinü athsangnyang müire, Sünü alicho dee ngusohro abinü athsangthsi chingre.

²⁰Akureng lümlong hirü mümüwanung, ko müle mütsarü achongcha la züdure.

²¹Amongdongrü tsü au nengdang longwümnung; ko adohrü au tsü akünyang müle.

²²Akünyang lasih tsü moi atsa; ta lümtohba tsünü arüh kungsohre.

²³Yuje mücho yu kharünü rangnü pohsa khyüre, ko yujeba tsü münguchire.

²⁴Athoh zehrünü nguchi atsa nengdang dhengre, ta adohrünü apümlang dhengre.

²⁵Amüpisa tsurünü au khyang awah ko atpa khyang alongmüzi hirojüre.

²⁶Achomükehrü te thsi tsuba tsü amüthsalang; nyitsarü atsa khingchiba tsü yuje chümbhisohre.

²⁷Asithsarünü dee müchore. Anyichehrünü yah-a du lire.

²⁸Adohrü mii yuva müchüro pümkhang bürünü lümlong lirü ko amüdherü roh-i lümre.