Read Sangtam Naga CHOYOH 19 Bible Online

CHOYOH 19 - Sangtam Naga bible

CHOYOH 19

¹Yuje mücho adohrü thsanung tenü iilümnü yuje chocho atsau.

²Amüdhe mülipü longphicho tsü mütsa; mürangchochonü achongcha la züdure.

³Nyitsarü khürünü abürü nguchi amütsanü abürü jowüpü ABÜDONGBA mütangre.

⁴Alirülü shangrü asi adrong ngure, ta ailümrülü ashangrü mii pehjüre.

⁵Arahkheh yuzi thsarü mükhingchipü mülinung; arahkheh chorü tsiphuchah müle.

⁶Atümungnü atungte nyitsarü khyang müdhesohnung müküpre; amükangnü jürü te shangrü thsanyüre.

⁷Ailümrülü jünirünü mii thrünyire; akhang, ashangrü nülü khüdoi abi pehjünung. Abinü yunü kihcho nye mürore.

⁸Sünü lümlong nguro abinü apu müire; sünü abi anyichehba tsü lümkehro abi müwanung.

⁹Arahkheh yuzi thsarü mükhingchipü mülinung; arahkheh chorü changnung.

¹⁰Adohrünü bholo mülibae, ko ayurünü langnürü michah yangthsa müthsabae.

¹¹Nüh alümdhengrü thsakhang, nü zichürocho nyümling. Khürünü nüh müthikehsode rangchoba tsü ahechi arangcheh.

¹²Yangthsarü rihlong chürocho tsü kihkhünying rengcho kyole, ta abinü mürucho tsü zanu michah yingkih kyole.

¹³Amüsithsa atsurünü au khyang athsangnyang hirore, ajümjüm nitpürü tsü mükhyang shoba tsing kyole.

¹⁴Kuh ko kuthsi tsü au chahnü thsiking, ta asithsa nitpü tsü Tsingrangbanü jüre.

¹⁵Ayungsühnü yüpnyü-nyinyüsohre ko adsere kangsohre, ta kongnung.

¹⁶ABÜDONGBA yuzeng nyirü kutsüpnung; hütsü khipehkhang nüh sünung.

¹⁷Ailümrü khyang jüba tsü ABÜDONGBA khyang nyajüre; ko ABÜDONGBAnü nü khyang thali jünung.

¹⁸Aza denü nü tsurüti rahsehng. Hütsüta müthsahkhang nühnü arüh thsangnyangba la trore.

¹⁹Zii mütsarü abinü hütsü mülichi ngunung; nühnü abi hütsütanü nüchehkhang; anyüpiusü nühnü nguchinung kangnung.

²⁰Thsüchicho nühnü nyikhang ko nyichonung lümkhang, nüh nyümong khüdu lümlong lirü kangnung.

²¹Nyitsarünü lümchung lüpcho külüpre, ta ABÜDONGBA lümcho du tikehnung.

²²Müxümünguba tsü ashahnung ko ailümrü tsü arahkhehrü tenü atsau.

²³ABÜDONGBA jengreng drükhang dhsürü lanü tsiphu nüh kutsüpnü longnyüp linung.

²⁴Nyitsarü khürü apu be la tsang nyümnung mii müngangre.

²⁵Hongzirü khingching, hütsükhang amümüdherü hütsü khu nyichonung. Nüh lümlong likhang mülichijüde nyichonung.

²⁶Ashah mükeh, romih chehrünü du au mümüire mahkhang atpa kuh lanü iipehre.

²⁷Itso, nühnü nyichonung zahde, nyicho licho mii nbüchopehnung.

²⁸Khürü thsakehjünung lümjungpü yuzi jücho la yuje müzeh. Akhürahrünü amünyi du müire.

²⁹Mülangjüba tsü müthsamünyürü nengdang rungnümjung lile, ko amüthseh adohrü yutsatsa xüpnahnung.