Read Sangtam Naga CHOYOH 23 Bible Online

CHOYOH 23 - Sangtam Naga bible

CHOYOH 23

¹Adirü te tsuyongnung pümde abi tsü sünang müdheing.

²Nüh münyo nye khüh nyehlieng.

³Tsuyongnung atsa ngu tümüxümüngu; tunüo nüh kihyochünung külüprüsü mümüdhe.

⁴Kuthsi yangde nüpu müchangnung müzahng.

⁵Nü kuthsi tsü nahsüp müthsade aqo chicho roh-i müdi kyo mongtsinung.

⁶Axükehrü kuhla tütsuyong mahkhang abinü tüpcho tsuyongnung atsa nengdang tümükhyah.

⁷“Rung ko khü tsung” pü abinü yore, ta hütsü yuje mah. Abi lasilü yujeba nü te müle.

⁸Nühnü tsuba apüm külopehnung ko nü yu atsa tsü apüm amükang kangnung.

⁹Amongdongrü te akhyüba yu tüchota; tunüo nü yu tsü abinü hoh-müthsa.

¹⁰Jümürü lurü tülohmüi mahkhang mürürü lih tükengcho.

¹¹ABÜDONGBA tsü arüh khümrü, Abinü nüh nyüm arüh nengdang yanung.

¹²Nührü dorü te nyieng ko akohcho nyichoung.

¹³Azarü rahsehnung tütütohnyünyeh. Akhehnü tangchonü abi müsünung, ta

¹⁴hütsünü abi akang khümchonung.

¹⁵Itso, nüh lümlong lirü kangkhang, Ih dee künyangnung.

¹⁶Lümlong li yu chocho yuchide Ih künyangnung.

¹⁷Amünyi nyitsarü tümükhyah; ABÜDONGBA jengreng dronü nü kang lieng.

¹⁸Hütsüta likhang aronung la nü kang alongdi lile.

¹⁹Nyieng Itso, lümjing ko nüh khüta lirünang soh lümdheng.

²⁰Yongkha müxüprü mahkhang tsukhuyongkhurü yola tümükhong.

²¹Amüxüprü ko tsukhuyongkhurü iilümnung. Tsupü yüpjodukhang tunyah mülipü nüh shüthreh müpinung.

²²Nüh nümüsuba nüu yu nyieng, ko nü tpa ashilarü kangde tüthrünyi.

²³Yuje tsü lih-eng ko hütsü tüi; lümlong athülaba ko anyicheh lieng.

²⁴Amüsarü khüdu au tsü khütang künyangnung aleng, tunüo asithsa atsurü khyanglang künyangre.

²⁵Nü khyanglangnü nüu ko nü tpa künyangsohng; nü tpa khyang hiba akünyang tsü jüng.

²⁶Itso I yocho nyieng, ko I kang adüzü khyüng.

²⁷Nahtrahnaxeng ko mabomashi khingkurü tsü asüba shukuh lile.

²⁸Arühnü fükhohrü roh-i thseh pümre ko adrong yuje mücho kangsohre.

²⁹Sürü ahohahro? Sürü wahro? Sürü yupejarong liro? Sürü longmüsüro? Amükangnü sü chah iha kehro? Sürü nahtse mohro?

³⁰Arüh tsü müyüp müxüprü ko yongkha asi yangchirüti lile.

³¹Shing la yongkha amoh tsüchinü nyehkeh ngude nühnü tümükhyah.

³²Achangka la hütsünü müyüh zehba mürünü roh-i mükyühnung.

³³Nü nahtse la amüngu ngunung ko nühnü amücho chonung.

³⁴Kihku mungthri chah pümpü kihjü long la mülingchi rachirü roh-i nüh kangnung.

³⁵“I khyang khürünü shingko, Ih xüpsehko, ta Ihnü mülümchehre. Tuepü Ih müshemüsuchehro? Ih adesü yongkha yongnyüre pü nühnü yonung.”