Read Sangtam Naga CHOYOH 24 Bible Online

CHOYOH 24 - Sangtam Naga bible

CHOYOH 24

¹Amünyirü tümükhyah, ko arüh te shangrü tüthsa.

²Arüh lümlong shühkhatohnung du arah yangchire ko arüh bela amütsa du chürore.

³Lümlong ko anyichehba kuphi la kuh thsare.

⁴Amüdhenü thsidi ko atsah atsa kohronü kuh chongsah apüm la sehyahre.

⁵Lümlong liba tsü tase azeh nyitsarü tenü awüu, amüdhe tsü re tenü athsütahba.

⁶Tunüo lümlong lirü langnücho la rothsanung nühnü wüchehnung ko arükurü kükyo lichonü chita kohre.

⁷Choyoh yu tsü adohrünü nyichehnung dee athsah. Athsütah yu chotade abinü yonung tu mülire.

⁸Nühnü amünyi nguchinung du chungkhang, nü te yubejarongsohrüepü dsire.

⁹Adohrü lümcho apüm tsü amünyi. Müthsamünyürülü atümungnü thrünyire.

¹⁰Thsamütsa rode nehkhang, nüh tase azikyah.

¹¹Arahkheh la khürü süsohnung no tsikhang abi khümchonung tüdrü.

¹²Hütsü I nguchi mah pü nühnü yonung kohle, ta ABÜDONGBAnü nü lümcho müdhele ko nü yu khanung. Abinü nüh dheng yale ko müdhele. Nü nguchi aleng Abinü nü khyang jiyünung.

¹³Itso, thsakukih müyahng; hütsü atsae. Ko thsakukih nü müle la nyiyahcho kyo,

¹⁴nü nbü nengdang lümlong tsü atsaepü müdheing. Lümlong yangching ko nü suro tsanung.

¹⁵Yuje chorü arahnü kengchonung mahkhang abi kuh lanü fühnung arah külüprü akhürahrü tükyo.

¹⁶Amüsa nyitsarü dhünyehpi khülu nye thali shemüsure; ta amütsarülü athsangnyangnü changjüre.

¹⁷Nü rorüh khülude nüh tükünyang, ko abi ngahsehde tülongnyüp;

¹⁸mahkhang ABÜDONGBAnü hütsü ngu mükünyangnung ko Abi zichürocho zahpehnung.

¹⁹Münyirü khyang nüh tülümxüsoh; arüh tümükhyah.

²⁰Amütsa nyitsarü aronung alongdi tu müle; arüh dsi tsü mehpehnung.

²¹Itso, ABÜDONGBA drüng ko yangthsaba dhiching. Arüh nyüm yarü te tümükhong,

²²hitari nyitsarü dhrongyengnü changpehnung. Tsingrangba mahkhang Yangthsabanü jünungba dhsürü tsü nühnü mümüdheo?

²³Lümlong lirünü hirisü yo lile: Yukharünü khüpakhüla yu khaba tsü amüthsalang.

²⁴Thsamehrü abinü langjükhang, atümungnü abi thrünyinung.

²⁵Yukharü sünü athsamehrü mülangjüro abi müwanung ko aneng atsa ngunung.

²⁶Yuje lalingba tsü shangrü khung amünbüchünung.

²⁷Jungchah nü nguchi rungnüm, luh nguchi apüm thüm, hütsüpü du nü linung kuh thsaang.

²⁸Yuzi atsa mülipü khürü nyüm yuzi tüjü, mahkhang abi nyüm arahkheh tücho.

²⁹“Abinü I te nguchicho roh-i Ihnü nguchinung; abinü tu nguchicho hütsü thali mülihnung” pü nühnü tücho.

³⁰Adohrü adsererü khüdu shükusiluh khu Ihnü wücho.

³¹Luh tsü zeng ko zanunü chiti licho. Amükang lung tbü apüm khülupü licho.

³²Hütsü dhengmükang lümdhengde Ihnü anyichoba khüdu ngucho.

³³Azachah ngakehde, azachah yüpsehde ko azachah hongkoh müthsüpü yade,

³⁴aführü roh-i ailümnü ro nüh betinung.