Read Sangtam Naga CHOYOH 27 Bible Online

CHOYOH 27 - Sangtam Naga bible

CHOYOH 27

¹Atu nengdang tümüthseh, tunüo nyümongnü tu hirojünung mümüdhe.

²Aparü khyang nüh sesohng; khodesü abürü jangjang tüse.

³Amütsarünü hiroba athsangthsi tsü lung ko lihpi amüling tenü awüu.

⁴Rihlong tsü akhürah ko athsangnyang, ta nahmoh te kihtanung mükoh.

⁵Aranglangnü müicho tenü mishanü mülichijücho atsau.

⁶Thsakehjü nye shangrü chahlü longlangre; ta arorühnü nüh khyahride müzahng.

⁷Mijing lidelü thsakukih mii mütsunyüre, ta yangdelü akha mii anyiyah kangre.

⁸Kuh lanü za liba nyitsarü tsü asüp pehjüpü rachiba uza kyole.

⁹Tuji ko axümlichinü lasih künyangsohre, ta athsangthsinü akünyang shühnyangsohre.

¹⁰Nü shangrü thsanye, nüu shangrü thsanye tünbüchü. Nüh thsangthside nü jünirü tüyangchi; nü kurümrünü ashu la liba nü jünirü tenü awüba tronung.

¹¹Lümlong lieng, Itso, ko Ih künyangnung; I nyümrü te lalingnung I yu linung.

¹²Amüzahrünü dhsürü rocho ngupü müripehre, ta khoto nyitsarünü ningtoh wü dhsükehre ko akhanglang wahre.

¹³Adohrü sünü shirü thsite nengdang yuzi jünang abi kuthsi hütsüba thsite ngang khyüjünung athsalang.

¹⁴Sünü mütoh suropü züdenü akurümba te salüm yonang, hütsü müchümükehrü roh-i lile.

¹⁵Jüjünyangnyang khingkurü tsü shodu shoba tsing kyole.

¹⁶Hütsü zahsohnung tsü nyübong yaticho ko akheh la tuji kii bicho kyole.

¹⁷Idhsenü idhse zacho kyo, nyitsarünü nyitsarü chahnü nyichore.

¹⁸Sünü ngurüsih xükümro abinü asih tsunung, ko sünü abi michah lirü xükümro abi nengse ngunung.

¹⁹Kih la tsah tehmüla ngucho roh-i, lasihnü nüpu ngusohre.

²⁰Asülihnü khodesü mülongnyüpcho roh-i nyitsarü nahtse khodesü müjengre.

²¹Hon ko taripi michangnü tahdhengre; hütsüta nengsenü nyitsarü tüzodhengre.

²²Adohrü tsü nühnü sotsi lah nye, abi dohcho tsü nühnü xüpchehpehnung mükoh.

²³Nü yo san ko misü longi xüküm,

²⁴tunüo kuthsi tsü lede nengdang mah, ko yanglih tsü shangnü shang müyare.

²⁵Nühnü madong tsü xabülung ko madong anu chichide azong lang tsünü za xabülung.

²⁶Nü san nbüh lanü shü kyahng ko nü miza khürü icho lanü alih linung.

²⁷Anyingcho miza chahnü nüh ko nü kukhi ko nü kulilarü nengdang nyikih ngunung.