Read Sangtam Naga CHOYOH 28 Bible Online

CHOYOH 28 - Sangtam Naga bible

CHOYOH 28

¹Sünü mü-iichipü amütsarünü dro tsire, ta yuje chorü kihkhünying roh-i re zeh yare.

²Yuchonü thsamehde yangthsarü adrong mülitare. Ta khode langnürü tsü anyicheh ko amüdhe linang yucho khüdu tsü tase zeh anyahli yare.

³Yangthsarü sünü ailümrü khingchiro abi tsahma thsangnyangba tsing kyole.

⁴Nühnü yuzeng münyikhang amütsarü khümre; ta nühnü nyikhang arüh nyümre.

⁵Amünyi nyitsarünü yuje tsü mümüdhe, ta ABÜDONGBA yangchirünü tsa nyichehre.

⁶Lipü yuje müchonung tenü iilümpü yuje chocho atsau.

⁷Dhrezarü sünü yuzeng nyiro abi athsehthsa. Sünü tulamüyohrü te shangrü thsaro abinü au ashah khyüsohre.

⁸Sünü bürü michahnü ajehyoh khyüchonü alirü kangro, abi kuthsi tsü ailümrü te yanglilüm ngurü khürü yo kangnung.

⁹Nühnü yuzeng münyikhang, Tsingrangbanü nü dangkhidangnang tsü nyingnung mii thrünyinung.

¹⁰Yuje chorü amünyi la xohsohkhang, nüpu zeng la nüh xohnung. Achomükehrü aleng jiyünung.

¹¹Alirünü arüh du amüdheba roh-i lümre, ta ailümrü, sü anyichehba liro abi amüdheuba thsare.

¹²Nyitsarü atsanü yangthsacho ngude, atümung künyangtare, ta amütsarü yangthsade atümung shehlire.

¹³Nü münyi rangpünung müküpkhang nühnü khodesü akoh müngunung; ta sünü nyengchoro ko pehjüro, abi te Tsingrangbanü achomang ngunung.

¹⁴ABÜDONGBA yocho lede nyieng ko nüh künyang linung, ta lasih müküpkhang dhsürü mütohnung.

¹⁵Ailümrü nengdang akhürah yangthsarü tsü reng liba kihkhünying ko shühmü kyole.

¹⁶Alümdheng müliba yangthsarü tsü adrünung adiuba; ta sünü yuje mücho thrünyiro abinü anyahli yangthsanung.

¹⁷Sünü bürü mapsehro apu kong dhsüthsa jure; sünüsü abi tütro.

¹⁸Yuje choung ko nüh khümchonung. Nühnü yuje müchokhang, thohdhünü nüh khülunung.

¹⁹Müküp nguchiba luthsarü atsunung kükyo lire. Adengting la bekhyah pehrü lede iilümnung.

²⁰Yuje chorü amüwanü thangchi linung; ta nühnü dhsüthsa alirü kangnyükhang, nüh mükhingchipü mülinung.

²¹Khüpakhüla tsü amüthsalang. Ta yukharü khürünü pohsa azikyah ngang mii thsamehre.

²²Thsamütsa suro khode ro mütohnung mümüdhepü axükehrünü alirü kangnung dhsüthsare.

²³Khürü mülichijüng ko abinü akhanglanglü nengse jüba tenü awüu künyangnung.

²⁴Tburü kuthsi fühcho tsü amülanglang, sünü lümnang abi mungkhung aführü tenü papa müle.

²⁵Müruthsanü achongcha du chürosohre, ABÜDONGBA chah longlangba tsü nü nengdang dee atsau.

²⁶Nü lümcho du nguchiba tsü amüpisa. Lümlong lirünü docho nguching ko nüh khümcho linung.

²⁷Ailümrü khyang jüng ko nüh khodesü mümüdsinung. Ailümrü ngude nünah müyehtikhang, nyitsarü adrongnü nüh chokehcholanung.

²⁸Nyitsarü amütsanü yangthsade, nyitsarünü shehlire, ta khode arüh khülunang, Amüsarünü thali yangthsanung.