Read Sangtam Naga CHOYOH 30 Bible Online

CHOYOH 30 - Sangtam Naga bible

CHOYOH 30

¹Hiri hi Jakeh tsurü Agur yu lile: “Tsingrangba I te müle, Tsingrangba I te müle, ko I trorü müle.

²Ih kanglungrü du kyole; Nyitsarü lümlong I chah müzeh.

³Lümlong tsü Ihnü khodesü münyicho, ko Tsingrangba nengdang tusü mümüdhe.

⁴Ninglangrü lümlong sünü müdhekhangcho? Sünü nyübong rangdhengcho? Mahkhang sünü shü la kih tümdhengcho? Mahkhang alimih lurü rühsahcho? Nühnü müdhekhang abi süo? Abi tsurü süo?

⁵“Tsingrangbanü anyengchocho apüm yohpüre. Abi khyang tsungtisohnung yangchirü atümung nengdang Abi tsü tsung.

⁶Nühnü Abinü müchocho khüdu chokhopü rikhang, Abinü nüh yübünung ko nüh tsü arahkheh chorepü ngusohnung.”

⁷Ihnü kihchire, Tsingrangba, Ih müsüde lang anyüh I khyang jüng;

⁸Ih arahkheh lanü za lisohng, ko Ih alirü mahkhang ailümrüsü tükangsoh. I tsuxah dükeh du I khyang jüng.

⁹Ih alaa likhang, Nüh müdhsüdah pü Ihnü yonung. Ta Ih iilümkhang, Ih fühnung ko I Tsingrang khyang ashah hirojünung.

¹⁰Khodesü Abüdongba te akuliba nyüm tüyo. Nüh chokehcholanung ko chongchanung.

¹¹Nyitsarü khürünü au chokehcholare ko atpa neng müsere.

¹²Khürünü athrünyinung khüdu lipü müsarü roh-i lümre.

¹³Khürünü khütang atsa roh-i lümre, khüta atsau pü arühnü lümre.

¹⁴Khürünü ailüm thsangthsirü chahnü ajingcho khyüre; hütsüta arüh akang lire.

¹⁵Aveh tsü aza anyüh lile ko anyüh neng tsü “I khyang khülo!” Khodesü long münyüpba lang müyü lile:

¹⁶Asürü limih, azarü müliba khingkurü, tsing thsütahba alih akung, ko mümapmehchehba michang.

¹⁷Sünü au münyüjünang mahkhang atpa ashilang mükhimüngunang abi müdinü tsunung mahkhang rangmü khüyahlanü anahtse mükyücheh pehjünung.

¹⁸I nengdang nyichehnung khütang athsah anyemüyangnung lang müyü lile.

¹⁹Ningwüm la yeba müdi lang, lung chah chichiba mürü, kihdi la kihkuhnü lang ngu tsiba, ko adhrerü khingkurü müitaba.

²⁰Yuje mücho nitpürünü hita nguchire: Nahtrahnaxengpü mütsahpehnung ko “Ihnü tu amütsa münguchi” pü yore.

²¹Aliminü mürangchoba lang müyü lile:

²²Ayurünü yangthsarü kangcho, adohrü atsunyücho lüpcho licho,

²³athrünyinung khingkurü xengcho, ko kulilarünü abüdongtpü iichehcho.

²⁴Limih la kanglungrü anümnüm müyü lile, ta khütang athsehthsa:

²⁵Tsangsüh: arüh suh müzeh, ta arühnü müyüde tsuyongnung khyübülung zahkehre.

²⁶Dhengtsü: arühsü tase müzeh, ta arühnü lungdhong la arüh kuh külüpre.

²⁷Khengqu: arüh yangthsaba müle, ta arühnü achungnü tsehre.

²⁸Lekyangkyang: abi nü müyola binung kohre, ta arüh yangthsarü kuhla du ngure.

²⁹Adhengnung jengreng keh tsehba akang müyü lile:

³⁰Kihkhünying, kanglungrü apüm tenü tase azehba ko tusü müdrüre;

³¹Miza, hünapung mütrahcho, ko mono bekhu yangthsarü tsehcho.

³²Amüsithsarü kyo hongzinü amünyi lümchungkhang zahng ko lümdheng!

³³Nühnü nyikih xükhang, asu chürore. Nühnü bürü nabongla shingkhang, ashüh shore. Nühnü zichürosohkhang, athsangthsi la züdure.