Read Sangtam Naga CHOYOH 7 Bible Online

CHOYOH 7 - Sangtam Naga bible

CHOYOH 7

¹Itso, I yu nyieng ko I yuzeng yohpüng.

²Ihnü yocho nguching ko nüh tsa linung. Nü nahtse nengdang müzahcho kyo I yuzeng yohpünung müküpm.

³Ihnü docho lede lümkehng; nü lasih la thrahkeng.

⁴Lümlong tsü nü nilarü kyo ko asithsa tsü nü shangrü khung kyo bichieng.

⁵Hütsünü khingkurü amütsa chahnü ko abükyü münyehcho yu lanü nüh khümchonung.

⁶Nyümong khüdu Ihnü kuh nyübongkhi lanü dhengchahchücho,

⁷ko dhrezarü adrong yola pathsa amüpisa dhrezarü khüdu ngucho.

⁸Ananglang khingkurü khüdu liba amünyeh,

⁹amalang, nahnü müngude abi hütsü kuh lahkhu tsi yacho.

¹⁰Ko dheng, abükyü tsü nahtranaxenglarü jengki khyüpü ro abi shirünung chürocho.

¹¹Abükyü tsü müsi amülah ko ashahmükeh, lede lang tung du rachi,

¹²khüpi yanglong la khüpi shithsachah ananglang ying rachicho.

¹³Dhrezaba tsü khyaripü be mütsüpcho ko dhengkehnü yocho,

¹⁴“Chünye Ih amübü jüchoe ko hütsü lanü hirocho shuh lile.

¹⁵Hütsünü nüh yangchi rochoe. Nüh shirünyo yangchicho ade nguko.

¹⁶Ijip lih lanü hirocho shü anananü I chongnong khyang yohpüle.

¹⁷Hütsüla Ihnü aloes ko shingsheng axümlichi xahkehko.

¹⁸Rung, Ihjü müyüp müitanung. Wüptanü Ihjü künyangtanung.

¹⁹I nii kuhla müle. Abi ashulang shitseh tsiko.

²⁰Abi thsi kükyo hipü tsiko ko anyü mülihpü du ronung.”

²¹Hütsüta abi müshülicho ko yu anyiyah tsü abinü nyicho.

²²Khütang dhsüthsanü misüpung amapsehnung hitsi yacho ko zeng yang khakhu thranung mütsüp-pü shümüshü khyachi wücho kyo.

²³Abi akang dhsürü lilepü mümüdhepü uza kyo abükyü yola wücho.

²⁴Itsurüti, ade I yu nyieng. Ihnü yocho tüpehjü.

²⁵Hitari khingkurü khyang tükichosoh; hitari yang tüwü.

²⁶Abükyünü nyitsarü adrong akang thsangnyangjüko ko mükhilong süsohko.

²⁷Abükyü kuh yang wükhang nüh asürü lih yang würe. Hütsü asülang alahtsah lile.