Read Sangtam Naga CHOYOH 8 Bible Online

CHOYOH 8 - Sangtam Naga bible

CHOYOH 8

¹Lümlongnü müzüderü do, anyichehnü yuva müchürorü do?

²Langjüp akhang chah ko langtpah la abükyü yare;

³Yangdi la züdulang, tbükhüm te abükyünü züdere;

⁴“Amüi tsurü te Ihnü kihchire, Limih la lirü te Ihnü züdere.

⁵Nührü mülümjingrü do? Lümjing. Nührü müsithsarü do? Nyichehnung müküpm.

⁶I yu akhacheh nyieng; arahkheh Ihnü thrünyire.

⁷Ihnü yoba tsü yuje; Ihnü athsalang du yore.

⁸Ihnü yoba apüm yutsatsa; arahkheh mahkhang amüthsalang tusü müzeh.

⁹Asithsarü nengdang apüm atsitsa; amüdherü nengdang apüm misha lile.

¹⁰Taripi tenü Ihnü thülacho throung; amüluchehcho hon tenü lümlong throung.

¹¹“Tunüo, lümlong tsü thsidi lung tenü atsau; tunüsü hütsüte mükitacheh.

¹²Ih lümlong, ko I chah asithsa lile; I chah amüdhe ko yuje yukhaba lile.

¹³Amünyi thrünyiba tsü ABÜDONGBA drüba; Ihnü künyangküshi, hongzicho, amütsa lang ko arahkheh yu thrünyire.

¹⁴Ihnü Lümchung külüpre ko hütsü nguchire; Ih amüdhe ko suh azeh.

¹⁵Ihnü yangthsarü khyang yangthsasohre; ko langnürü khyang yuzeng atsa külüpsohre.

¹⁶Ih khu limih la athsarü, langnürü ko thsazirünü yangthsare.

¹⁷Sünü Ih müiro Ihnü abi müire; sünü Ih yangchiro abinü Ih ngunung.

¹⁸Kuthsi, adhichi, rii ko akoh jünung I khehla lile.

¹⁹I chahnü nguba tsü amüluchehcho hon ko taripi tenü atsauba.

²⁰Ih Amüsaba lang la tsehre; Ih yujeba lang la iiwüre.

²¹Sürünü Ih müiro arüh müwajüre, ko arüh kuh kuthsinü jengjüre.

²²“Papade, ABÜDONGBA nguchi apüm yola, Abinü Ih akhu thricho.

²³Adikehdi, alimih müthriede Abinü akhu Ih külüpcho.

²⁴Kihnati mülide ko kihjüti müchüroede Ih akhu surocho.

²⁵Azongti ko akhangti müchüroede,

²⁶Tsingrangbanü alimih ko hütsüla angah mahkhang akhudiba alih mülung müthriede Ih akhu surocho.

²⁷Abinü ning chungde, kihjü michah mükangti threhde,

²⁸ning chah nyükhi chürosohde, ko kihjü yongnati khangthrude;

²⁹Ko Abinü yocho chah alaa müjanung kihdi khyang yuzeng jüde, Ih licho.

³⁰Trüpthrirü khüdu kyo, nyümong mükhu I chahnü Abi akünyang ngu, Abi jingte lede künyang,

³¹alimih te ko liküprü te künyang Abi müshüm Ih licho.

³²“Ade I tsurüti, I yu nyieng. Ihnü yocho nguching ko nüh künyang linung.

³³Nü te docho nyieng. Lüm zehng; ko hütsü tüpehjü.

³⁴Sünü I yu nyinü, nyümong mükhu I trahtri te püm, I kuh lang wüba lang la yingro, abi akünyangnung.

³⁵Sünü Ih ngunang akang ngure, ko ABÜDONGBAnü abi te künyangnung.

³⁶Sünü Ih müngunang apu jangjang lerohpehre; Sünü Ih thrünyinang asüba müire.”