Read Sangtam Naga THSINGYURÜ 1 Bible Online

THSINGYURÜ 1 - Sangtam Naga bible

THSINGYURÜ 1

¹Jerusalem la yangthsaba, David tsurü, Athsingyurü yu.

²Amükang yola amükang, Thsingyurü tsünü yore, akang hi amükang, apüm adeng.

³Nyitsarünü ning pohki kheseh nguchicho tu jingchoro?

⁴Shang khüdu tsire ko shang apa khüdu rore, ta limilü asusuh du lire.

⁵Nyü tsü chürore ko thali achüroji lang dhsüthsa züdure.

⁶Nyübong tsü kihjinglang ko kihkulang mükang du mükang füre.

⁷Yongkhi apüm kihdi la pohyohre, ta kihdi tsü müjengre. Kih tsü apohchehcho lang thalire ko pohchehlire.

⁸Lüpcho bhamülingnü jeng lile; benü müyochehba bhamüling. Anguchonü nahkoh müjeng ko ayuchichonü nangkhi müjengre.

⁹Tu licho hütsü du linung; tu nguchicho hütsü du thali nguchinung. Ning pohki tu asi müle.

¹⁰“Dheng, hi asiepü yonungthsa lango lirü do?” Ta, hütsü papadenü licho.

¹¹Papade tikehcho sünüsü mülümkehre ade ko aronung la tu tikehnung hütsüsü sünüsü mülümkehnung.

¹²Ih, Athsingyubong tsü Jerusalem la Israel michah yangthsarü thsacho.

¹³Ning pohki nguchiba lüpcho nengdang thsatso yangchinung Ihnü dhrongchehcho. Tsingrangbanü Ihsa khyang thsamütsa dira jüko.

¹⁴Ning pohki nguchicho lüpcho Ihnü nguko ko Ihnü yore, hi apüm amükang. Hi nyübong iichicho kyole.

¹⁵Akureng müchongsohnung mükoh; mülicho khidhengnung mükoh.

¹⁶Ihnü Ipu te yocho, “I müngu Jerusalem la yangthsarü atümung tenü khüdupinü I lümlong aliba kangko. Lümlong ko amüdhe tsü tunang Ihnü müdhele.”

¹⁷Amüdhe ko amümüdhe, lümlong ko amüsithsa papa tsü tunang nyichehnung Ihnü dhrongchehcho. Ta hütsüsü nyübong iichicho du kyonungepü Ihnü rangchehcho.

¹⁸Alaa asithsau kangde alaa lümtpahnah rore; alaa amüdheu kangde alaa du awah zikehre.