Read Sangtam Naga THSINGYURÜ 2 Bible Online

THSINGYURÜ 2 - Sangtam Naga bible

THSINGYURÜ 2

¹Ihnü Ipu jangjang longnyüp li akünyang tsü tunang rangchehnung lümcho. Ta hütsüsü amükangepü Ihnü rangchehcho.

²Münyüba hisü amüsithsaepü Ihnü rangchehcho, hinü nü khyang tu atsa müjü.

³I müruchonü lümlong nengdang iichide, yongkha yongnü longnyüp linung Ihnü lümcho. Alih la akang azachah lide hiroh-i linung tsü atsauepü Ihnü lümcho.

⁴Ihnü nguchi amülah nguchiko. Ihnü Ipu shulüm kuh thsako ko shükusiluh khyümko.

⁵Ihnü tbü ko singsih yo singsih adhangpi zeh khyümchehko;

⁶ko hütsüla xahnung kihkong jucho.

⁷Ihnü ayurü adrong licho ko Ipu kuh lanü suhchehcho ayurüsü licho. Jerusalem la li rorüh atümung tenü Ihnü akang kuthsi alaa lihchehko.

⁸Ihnü thsaba yanglihti lanü hon ko taripi khyübülung khangpücho. Khingkurü adhrerünü Ih künyangsohnung khi thsacho ko Ihnü mürucho khingkurü kükyo licho.

⁹Ho, Ih amülah thsacho, Jerusalem la li rorüh atümung tenü adiu thsacho, ko Ih lümlongnü jeng licho.

¹⁰Ihnü khyünyücho lüpcho Ihnü nguko. Ihnü mükhyahcho tusü münguchipü müle. Ihnü nguchicho lüpcho müdhang Ihnü müthsehcho ko hiri apüm I jiyü thsacho.

¹¹Hütsüde Ihnü nguchicho apüm ko hütsüri khüta müküp nguchicho hütsü lümdhengde hiri apüm adengepü Ihnü nyichehcho. Hütsü nyübong iichicho kyo tu akhyüchah müle.

¹²Yangthsarü khüdunü müngulang yangthsarütinü tu nguchicho hütsü du nguchire. Hütsünü lümlong licho, mükyangcho mahkhang amüsithsa nengdang Ihnü lümdhengnung dikehcho.

¹³Ade “Ama tenü atsingse atsau thsacho kyo, amüsithsa tenü lümlong tsü atsaubaepü Ihnü müdhele.

¹⁴Lümlong lirünü arüh khüde würünang müdhele, ta amüsithsarünü mümüdhe.” Ta hütsüba suro akyokyo tsü Ihsa atümung nengdang yinglepü Ihnü müdhele.

¹⁵Ihnü Ipu lasih la lümcho, “Amüsithsarü chah tikehba suro tsü I chahsü mütohnung. Khang lümlong hidoi liba tsü Ih tu jingchocho?” Ipunü lalingcho, “Tusü müjingcho.”

¹⁶Sünüsü lümlong lirü mülümcheh, ko sünüsü amüsithsarü mülümcheh. Aronung lalü Ihsasü atümung nbüchopehnung. Lümlong lirü ko amüsithsarü akyokyo Ihsa atümung sünung.

¹⁷Hütsünü I nengdang akang tsü tu mah, tunüo hütsü apümnü I khyang achongcha du hirojüko. Hütsü apüm amükang; Ih nyübong iichi rachiko.

¹⁸Ihnü nguchicho ko shehcho tusü I nengdang amii müle, tunüo hütsü I khanglang roba khyang pehjünung duepü Ihnü müdhele,

¹⁹ko kümüdeo abi tsü lümlong ali, mahkhang amüsithsarü khüdu thsanungsü kohle. Ta Ihnü nguchicho ko hiba lih la I lümlongnü I khyang shehjücho lüpcho abi yo kangnung. Hi apüm amükang.

²⁰Hütsünü Ih hütsüdoi khee nguchicho ditpang lümre.

²¹Nühnü lango nengdang nü lümlong, amüdhe ko thoh apümnü nguchipü hütsü münguchiba nyüh khüdu khyang apüm pehjünung. Hi amii müle ko hütsü athsalang mah-o?

²²Nühnü akang ayung nguchire ko khere ko hütsü nengdang angusohnung tu liro?

²³Nü akangli ayung, nühnü nguchicho lüpchonü awah ko lasih mütrung chah khu apa tusü mühiro. Aromang miinü lasih mükyahshangcheh. Hi apüm amükang.

²⁴Nyitsarü nengdang atsau tsü abinü shehcho tsü tsuyongpü künyangchi linung. Ta hisü Tsingrangba chahnü rorepü Ihnü lümchehre.

²⁵Mahkhang abi tenü za sünü tsuyongpü künyang lichehnung?

²⁶Sünü Tsingrangba künyangsohro abi khyang lümlong, amüdhe ko akünyang jüre, ta abi künyangsohrü khyang jünung nengdang, abinü münyirülü nguchisoh, shehsoh ko khyübülongsohre. Hi apüm amükang. Hi nyübong iichicho kyole.