Read Sangtam Naga THSINGYURÜ 3 Bible Online

THSINGYURÜ 3 - Sangtam Naga bible

THSINGYURÜ 3

¹Ning pohki lüpcho nengdang akyang khüdu lile:

²Asuronung bekhyah khüdu, ko asünung bekhyah khüdu; akhyümnung bekhyah khüdu, ko rohchehnung bekhyah khüdu.

³Müpsehnung bekhyah khüdu, ko kyangjünung bekhyah khüdu; Tphünahnung bekhyah khüdu, ko thsachinung bekhyah khüdu.

⁴Tranung bekhyah khüdu, ko münyünung bekhyah khüdu; metranung bekhyah khüdu, ko nyiichinunng bekhyah khüdu;

⁵Müitanung bekhyah khüdu, ko mümüitanung bekhyah khüdu; be müthsüptanung bekhyah khüdu, ko be mümüthsüptanung bekhyah khüdu.

⁶Ngunung bekhyah khüdu, ko changnung bekhyah khüdu; Khyübülungnung bekhyah khüdu, ko shupehnung bekhyah khüdu.

⁷Rohnahnung bekhyah khüdu ko xürütanung bekhyah khüdu; naying linung bekhyah khüdu ko chotanung bekhyah khüdu.

⁸Müinung bekhyah khüdu, ko thrünyinung bekhyah khüdu; rothsanung bekhyah khüdu, ko yangtsa bekhyah khüdu.

⁹Ihsa nguchi lanü Ihsa tu jingchoro?

¹⁰Tsingrangbanü Ihsa khyang jüba bhamüling tsü Ihnü müdhele.

¹¹Abinü lüpcho shulüm akyang yohpüjüle. Abinü Ihsa khyang aronung müdhenyüba lümlong khüdu jücho, ta Abinü nguchiba ajeng longkyang nyichehnung müjü.

¹²Hütsünü Ihsa akang lide künyang ko akohchonü atsau du nguchi linung atsauepü Ihnü lümchehcho.

¹³Ihsa atümungnü Ihsa nguchi ngang tsuyong künyangbae. Hiba hi Tsingrangba jiyü lile.

¹⁴Tsingrangbanü nguchicho lüpcho tsü müchangkapü linungepü Ihnü müdhele. Nühnü hütsüla tusü mülahkehcheh, mahkhang hütsü lanü tusü mühitsicheh. Ko Tsingrangbanü lang khüdu nguchiba tsü Ihsanü Abi drüsohnung nguchi nguchire.

¹⁵Tuturü tikehro, mahkhang tikehnung kohro; hütsü tikehpehcho. Tsingrangbanü lango du tsü loli loli tikehsohre.

¹⁶Alathsa, hiba limih athsalang ko yuje mülipü akhürah ngure.

¹⁷Ihnü Ipu te yocho, “Tsingrangbanü Amüsarü ko amütsarü apüm yu khanung, tunüo lüpcho nguchi apüm abürü akyang du tikehnung.”

¹⁸Kanglungrü tenü Ihsa tu atsauba mah pü ngusohnung nengdang, Tsingrangbanü Ihsa thsatsürepü Ihnü nyichehcho.

¹⁹Tunüo, suro akyokyo tsünü nyitsarü ko kanglungrü yingre. Akhüu kyo khüdu tsüsü süre. Anyüding kanglungrü du lile. Nyitsarü tsü kanglungrü tenü atsauba mah, tunüo anyüding nengdang akang tsü adüzü müle.

²⁰Anyüding müdüm khüdu alih yang würe. Anyüding hütsülanü rocho ko hütsü yang du wünung.

²¹Nyitsarü nbü tsü amunglang küdure ko kanglungrü nbü tsü alih yonglang züdurepü khüta müdhenung?

²²Hütsünü Ihsanü nguchicho ngang künyangchi linung tsü atsaubaepü Ihnü lümchehcho. Ihsanü nguchichehnung apa tu müle. Ihsa süpü tu tikehnung hütsü müdhenung tu lang müle.