Read Sangtam Naga THSINGYURÜ 4 Bible Online

THSINGYURÜ 4 - Sangtam Naga bible

THSINGYURÜ 4

¹Hütsüpü Ihnü hiba limih la yuje mücho apüm dhengcho. Asehtirü tsü atrorü süsü mülipü tra licho. Sünüsü arüh mütrochehcho, tunüo arüh sehtirüti tase kehcho.

²Sürü sücho ko tsicho Ihnü arüh mükhyahre; ade akang lirü tenü arüh atsauba.

³Ta anyüding tenü atsauba tsülü sürü müsurojungcho, ko hiba limih la yuje mücho hi müngudhengcho arüh atsauba.

⁴Nyitsarünü tuepü akohnung hitoh-i müküp nguchirünang hütsüsü Ihnü nyichoko: hi arühnü kurümrü nahmohcho khu lile. Ta hi amükang. Hi nyübong iichicho kyole.

⁵Nyüh khüdunü akheh müthsüpü ajangjang kongseh sünung tsü amüsithsa nguchiepü arühnü yore.

⁶Hütsü thsanungsü kohle, ta kheh anyüdingnü nyübong rangnung mükhyang müdengcho tenü lasih tbachi azikyah licho tsü atsau.

⁷Ihnü akang la amükang adesü lango rangchehcho.

⁸Hila anehbi liba nyüh khüdu lile. Abi atsurü ko jünirü müle, ta abi lichonü anahkoh müjeng lede müdeng du lire. Sü khyang abi tusü akünyang müngupü hidoi khee nguchiro? Hisü amükang, akang amii müle.

⁹Khüdu tenü anyüh tsü atsau, tunüo anyüh yohrüta alaa aphishu nguchichehnung.

¹⁰Khüdu khülude akhüunü tronung. Ta nyüh khüdu anehbi ko abi khülukhang, hütsü khura mütsa tunüo abi trorü süsü müle.

¹¹Thsahkhang, nyüh anyüh müjang langchi yüpnung kohle, ta nü nehbilü khüta langchinung?

¹²Nyüh khüdulü mülakhüti kohnung, ta nyüh anyüh nülü khatachehnung. Asang chehrütacho rangshü tohsahnung athsah.

¹³Nyüh khüdu ailüm suro lanü yanglih la yangthsarü kangnung kohle, mahkhang akhangti kuh lanü yangthsaba pümji chihnung kohle, ta abi shipü athsüchiba münyikhang, abi azarü ko ailümrü, ta athsehthsa dhrezarü khüdu müchüro.

¹⁵Ihnü hiba lih la lirü atümung nengdang lümdhengko, ko arüh yola yangthsaba mülihnung khüdenang dhrezarü khüdu lilepü Ihnü lümchehko.

¹⁶Yangthsarü khüdu pohki nyitsarü mükhilong; ta abi khanglanglü abinü nguchicho nengdang anengse jürü süsü müle. Hi amükang. Hi nyübong iichicho kyole.